U-AKA usedelile wukuhlonishwa eMzansi

UMREPHA uKiernan ‘AKA’ Forbes useveze ukuthi akananxa nabahleli bomcimbi wezindondo amaSAMA emuva kwesitatimende asikhiphe enkundleni yokuxhumana uTwitter lapho ethe ucela ukungavotelwa emikhakheni aqokwe kuyona ngalo nyaka.

U-AKA uthe usebona ukuthi umsebenzi wakhe usuhlonishwe kakhulu eNingizimu Afrika ngakho izindondo ezifakazela lokho akasazidingi.

Kulo nyaka lo mculi uqokwe ngezingoma zakhe okukhona kuzo ethi Caiphus Song, World is Yours neDon’t forget to Pray ayicula no-Anatii.

“Ngiyacela ukuthi ningayimoshi imali yenu ngokungivotela kunoma yimuphi umkhakha engiqokelwe kuwona kumaSAMA,” kubhala u-AKA.

Uthe uyabonga kubahleli balo mcimbi ngokumnika ithuba lokuba yingxenye yawo.

“Anginawo umdlandla wokunxusa abantu ukuthi bangivotele. Alukho olubi phakathi kwami nabahleli balo mcimbi futhi akukho muntu enginenkinga naye kulesi sikhathi samanje,” kuchaza yena.

Uthe asafuna ukukwenza manje ukubhekana kakhulu nomculo nama-video ezingoma zakhe nezinkontileka anazo nezinkampani ezahlukene eMzansi.

“Konke lokhu engikushoyo angikusho ngoba ngizibona ngingcono kodwa kubalandeli bami imali yabo ngiyacela bayisebenzisele kwezinye izinto kunokuthi bavotele mina,” kuchaza yena.

Isikhulu esiphezulu kumaSAMA uThobela Dlamini sithe abanankinga nokushiwo ngu-AKA njengoba kungekho nkinga phakathi kwabo naye. Uthe bayakwemukela konke akushilo ngokuqokwa kwakhe kulo mcimbi.

Isithombe: INSTAGRAM U-AKA uthe akananxa nabamaSAMA njengoba esenxuse abalandeli bakhe ukuthi bangamvoteli eminxeni aqokwe kuyona emcimbini ozoba ngenyanga ezayo eSun City