Inkinga yezinyoka nokuwa kwesikole
BAFUNDA bejeqeza izinyoka besaba nokuwelwa wuphahla abafundi baseDundee Junior Secondary, eDundee abafundela ngaphansi kwesimo esingesihle, isikole sabo sinemifantu, sigcwele nezinyoka.
Lesi sikole okuthiwa sasisetshenziswa amakhaladi phambilini, sakhiwe ngokusatsheboya okubhodlokayo, phansi sinamapulangwe okuthiwa kulimale uthisha ovondloke efundisa.
Ngempelasonto umphakathi ubunomhlangano kubhungwa ngesimo sesikole okuthiwa bathenjiswa ukuthi bazokwakhelwa sona nguMnyango wezeMfundo ngo2013 kodwa kuze kube yimanje akwaziwa ukuthi kubambeni.
Abazali kuthiwa bayesaba nezingane zabo njengoba ngoLwesihlanu kuthiwa bayisithupha kuphela abafundi abaya esikoleni kubafundi abangu-866.
Umgqugquzeli wenhlangano i-Endumeni Civic Association, uMnuz Mzwakhe Sithebe, uthe sibi kakhulu isimo kulesi sikole, singawa noma yinini.
Uthe abafundi nothisha basengcupheni yokwehlelwa ingozi ngoba angavondloka amapulangwe emakilasini bashaywe yizinyoka.
“Kuhlale kutholakala izikhumba zokubuza kwezinyoka, okusho ukuthi zigcwele ngaphansi kwamapulangwe emakilasini. Izindlu zangasese ihlazo, othisha basebenzisa ezibhodlokile. Kuwe uveranda welinye lamakilasi sisemhlanganweni ngakho akuphephile kubantwana bethu,” kusho uSithebe.
Uthe nabomnyango bazisholo bona ukuthi akuphephile futhi akuyona indawo yokufundela abafundi.
“Emakilasini angu21 esikoleni, mahlanu kuphela aphilayo futhi kwawona angomahamba nendlwana. Amanye indaba yawo yinto engekho. Njengoba kuzongena ubusika, kuyabanda la, abafundi bazofa amakhaza ayavuza namakilasi,” kuqhuba uSithebe. Uthe izolo isimo sibe ngcono njengoba bebengu-581 abafundi kodwa abanye abezanga. Okhulumela umnyango, uMnuz Sihle Mlotshwa, uthe ihhovisi lesifunda liyalulungisa udaba lwalesi sikole. Uthe lesi sikole sifakwe ohlwini lokuphuculwa kwengqalasizinda yaso onyakeni wezimali u-2018/2019.
“Sizokwenza konke ukuze kube nesimo esikahle sokufunda nokufundisa abafundi. Ukuphepha kwabo yinto ebaluleke kakhulu emnyangweni,” kusho uMlotshwa.
Kwenzeka lokhu nje umnyango wehlise isabelo sengqalasizinda njengoba kuthiwa sizokwehliswa ngoR228 million.
Ethula isabelo sezimali uNgqongqoshe walo mnyango uMnuz Mthandeni Dlungwane wathi kudingeka baze bazishiye izinhlelo abazenzile zengqalasizinda njengoba kudingeka balungise izikole ezashaywa yisichotho.
Zingu-494 izikole ezakhahlanyezwa yisichotho ngoSeptemba no-Okthoba nyakenye.
UDlungwane uthe kunenkinga yokugcwala ngokweqile kwezinye izikole, kunezinhlelo zokwakha izikole ezindaweni ezehlukene.