Uvalo kusocongwa emakhaya amalungu amabili e-ANC
AHLALELE ovalweni amalungu e-ANC esifundeni iLower South Coast ngemuva kwezigameko zokusocongwa kwamalungu ombutho amabili ezehlakalweni ezahlukene, esikhathini esingamasonto amathathu.
UMnuz Sifiso Cele (42) okubikwa ukuthi ubenguMgcinimafa we-ANC e-ward 5, oShabeni kuthiwa ubekwakhe nomndeni elungiselela ukuyisa izingane zakhe esikoleni izolo ekuseni ngesikhathi ebulawa abasolwa ababili abangaziwa.
Ukubulawa kukaCele kwenzeke kungakapholi maseko kubulewe elinye ilungu le-ANC kulesi sifunda, uNksz Nombusa Mqadi nalo elihlaselwe lisekhaya ngasekupheleni kwenyanga edlule.
Okhulumela amaphoyisa KwaZuluNatal uCaptain Nqobile Gwala uthe umufi ubekwakhe nomndeni eMargate Extension 03, ngesikhathi abasolwa ababili abebehlome ngezibhamu behlasela.
UGwala uthe abasolwa bafike bakhomba abebephakathi endlini ngezibhamu bafuna imali namaselula, bavalela wonke umuntu ethoyilethi babatshela ukuthi bangaphumi.
“Abasolwa babe sebethatha umufi bamyisa ekamelweni lakhe lapho befike bamdubula khona amahlandla amane, base beyabaleka. Umufi uficwe wumndeni wakhe edubuleke ekhanda eshonele endaweni yesehlakalo,” kusho uGwala.
Uthe amaphoyisa aphenya icala lokubamba inkunzi nokubulala, wangeza ngokuthi bekungakaboshwa muntu. UGwala uthe imbangela yokubulala ibingakaziwa.
Ilungu le-ANC eLower South Coast elikhulume neSolezwe kodwa lacela ukuthi lingadalulwa lithe banovalo ngoba abazi ukuthi lesi sihlava sokubulawa kwamaqabane sivelaphi.
“Sekubulewe amaqabane amabili esikhathini esingaphansi kwenyanga kulo nyaka. Imbangela yokubulawa kwawo asiyazi,” kusho ilungu.
Isifunda, iLower South Coast kulo nyaka simatasa ngamalungiselelo okuba nengqungquthela yokukhetha ubuholi obusha okungakacaci ukuthi izoba nini.
ILower South Coast ingesinye sezifunda okubalwa iMoses Mabhida neHarry Gwala, okubikwa ukuthi zinezinkinga futhi azikaphumi nezinsuku zokuthi zizokwenziwa nini izingqungquthela zakhona.
Ilungu lesigungu esiphezulu le-ANC elijutshwe ukuthi libheke ukusebenza kwesifundazwe iKwaZulu-Natal, uNkk Edna Molewa lithe noma ngabe kuthiwa lezi zifunda ezintathu kuze kufika isikhathi sokuthi kube nengqungquthela yesifundazwe zingahlalile, ngeke ize iphazamiseke.
Uthe izithunywa zakulezi zifunda zizokwazi ukubamba iqhaza engqungqutheleni yesifundazwe ngoba zizoza zithunywe ngamagatsha azo.
UNobhala we-ANC eLower South Coast uMnuz Mzwandile Mkhwanazi usigxekile isigameko sokubulawa kukaCele, wathi siwubuqaba. Uthe bafe olwembiza ngokubulawa kukaCele obengusomaqhinga weqembu.