UPandor ucubungula izikhalo ngeNyuvesi yasoNgoye
USACUBUNGULA zonke izikhalo ngenyuvesi yaseZululand, oNgoye, uNgqongqoshe weMfundo ePhakeme, uNkk Naledi Pandor.
UNkk Pandor uvakashele inyuvesi ngempelasonto eyozwa izikhalo zezinhlaka ezehlukene emuva kokuthola izincwadi eziningi ezivela kwabakhathazekile ngenyuvesi.
Okhulumela uNkk Pandor, uMnuz Lunga Ngqengelele, uthe uhlangane nezinhlaka ezehlukene, okubalwa kuzo nalezo zabafundi.
Uthe abafundi bazwakalise ukukhathazeka ngokuthi abaqashi sebeyangabaza ukubaqasha ngenxa yezinsolo zokuthi iziqu ziyathengwa enyuvesi.
“Abafundi bakhala kakhulu ngokuthi kunzima kubona ngenxa yokuthi abaqashi bayababhekisisa, akulula ukuthola umsebenzi ngenxa yezinsolo. Lezi ngezinye zezinto uNgqongqoshe afike wazizwa ngabo abafundi,” kusho uNgqengelele.
Uthe zonke izikhalo uyazicubungula, bazophendula maduze ezinhlakeni ezithintekayo.
“Inhloso yokuvakashela enyuvesi bekuyozizwela izikhalo athole ukuthi izinkinga zikuphi. Usacubungula konke akuzwile. Yima ezonquma ukuthi yikuphi azokwenza nokuthi uzophendula kanjani,” kuqhuba uNgqengelele.
Uthe okubalulekile wukuthi akafuni kudicilelwe phansi isithunzi senyuvesi.“Kumele kutholakale isisombululo ngokushesha ngoba neSilo sazwakalisa ukweseka inyuvesi,” kusho uNgqengelele.
Khonamanjalo, izolo kuqalile ukuthweswa kwabafundi imiyezane.
Bawu-4 034 abafundi abazothweswa imiyezane kuleli sonto. NgoLwesihlanu uNgangezwe Lakhe wahlonishwa ngeziqu yinyuvesi ngokusebenzela umphakathi.
Phakathi kwezikhulumi kuleli sonto kubalwa uMnuz Faisal Mkhize, isikhulu se-Absa esifundazweni, uSolwazi Crain Soudien, isikhulu esiphezulu seHuman Sciences Research Council, uDkt Nathi Ngcobo, weDalisu Holdings neJaji Mjabuliseni Isaac Madondo, iPhini lamaJaji enkantolo enkulu esifundazweni.
Bawu-2 441 abesifazane babe wu-1 593 abesilisa abazothola iziqu.
Abayisithupha bazothweswa iziqu zobudokotela, 12 ezeMasters babewu-101 kwezeHonours.