Bacikekile onogada ngokwehliswa benyuswa
BAKHALA ngokulinda izitifiketi umlibe onogada osekuphele izinyanga ezingaphezu kwezintathu begqigqela izitifiketi nezimvume zokusebenza emahhovisi ePrivate Security Industry Regulatory Authority (Psira), eGreyville, eThekwini.
Isolezwe lifice ulayini omude wonogada izolo abebezovuselela izimvume zokusebenza okuba yisitifiketi nesigqebhezana esinesithombe somuntu.
UMnuz Thulani Mkhize waseVryheid uthe usenesikhathi efake isicelo sokuvuselela isitifiketi sokusebenza, uma eshayela ucingo kwaPsira, ePitoli utshelwa ukuthi izinto zakhe zilungile.
“Uma ngiza eThekwini ngibuyiselwa emuva kuthiwe izinto zami azikalungi. Kulokhu ngifike ngoLwesithathu oludlule ngatshelwa ukuthi ngibuye ngoLwesine. Uma ngifika bathi angibuye ngoLwesihlanu ngoba izinto zami azilungile. NgoLwesihlanu kuthiwe ngibuye namhlanje (izolo) kodwa namanje izinto zami azilungile,” kusho uMkhize.
UNksz Sthembiso Masondo naye waseVryheid uthe umqashi umnike isonto elilodwa lokuvuselela. “Kusukela ngesonto elidlule balokhu bethi angibuye ngakusasa ngoba izinto zami azilungile. Angazi ukuthi ngizobuya nini manje ngoba ngiyisebenzise yonke imali ebenginayo belokhu bethi angibuye kusasa. Sicela i-Independent Security Guards Association ingenele ngoba asisazi ukuthi senze njani,” kusho uNksz Masondo.
Unogada obesuka eHarding uthe kubuhlungu ukuthi iPsira inehhovisi elilodwa KwaZuluNatal, eThekwini kuphela.
Ukuvuselela isitifiketi nekhadi uthe kubiza uR84 kodwa bachitha eningi behliswa benyuswa, ngaphezu kwezinyanga.
UMnuz Joseph Mgobhozi we-Independent Security Guards Association, uthe ngesonto elidlule bebemashela inkohlakalo nokuxhashazwa konogada yiPsira. Uthe izolo bacele ukuthi kubhalwe izincwadi ezichazela abaqashi ukuthi abantu abanazo izitifiketi ngenxa yePsira.
“Siyathemba abaqashi bazobona ukuthi abantu abahleli kodwa bayazama ukufaka izicelo zezitifiketi. Aziphumi ngenxa yokungahleleki kwabakwaPsira,” kusho uMgobhozi.
Uthe balindele ukuthi abakwaPsira baphendule uhlu lwezikhalo abaludlulise ngesonto elidlule ngoba ngeke bakubekezelele ukuxhashwazwa konogada.
UMnuz Oupa Mamabolo oyiSenior Manager: Communications, Registration (CRM) and Training
kwaPsira uthe bayaxolisa ngokungabi khona kwezitifiketi, sebethumele izitifiketi emahhovisi aseThekwini.
Uthe izitifiketi zonogada zinobuchwepheshe besimanje obugwema umkhonyovu futhi maduzane kuzovulwa ihhovisi lesibili eRichards Bay.