Kuboshwe abanye kolwaseMabhida
SEKUBOSHWE abanye ababili ngezibhelu zaseMoses Mabhida Stadium okukhona kubo umfundi (21) waseNewlands West nomsebenzi wasengadini (42) waseHillcrest.
Umfundi utholwe namahead sets ne-microphone.
Abasolwa bazovela namhlanje enkantolo kaMantshi waseThekwini ngamacala okudala udlame emphakathini.
UBrigadier Jay Naicker wamaphoyisa KwaZulu-Natal uthe abasolwa bazinikele bona emaphoyiseni abazange balinde ukuthi ingalo yomthetho ifinyelele kubona.
“Siyabancoma abasolwa ngokuzinikela emaphoyiseni bangalindi ukuthi batholwe abaphenyi ngoba lokhu kusho ukuthi basenonembeza. Siyacela nabanye baziyele emaphoyiseni ngaphambi kokuthi abaphenyi bazifikle bona kubo. Abasolwa ababili bavalelwe ezitokisini, bazobingelela iMantshi kusasa (namhlanje),” kusho uNaicker.
Uthe uphenyo ngokwenzeka ngo-Ephreli 21 eMoses Mabhida luyaqhubeka ngoba bafuna bonke abasolwa babhekane nengalo yomthetho.
Amaphoyisa ngeke aphumule bengakaboshwa abasolwa ngokususa uthuthuva eMoses Mabhida ngesikhathi kunomdlalo weKaizer Chiefs neFree State Stars.
“Sicela umphakathi uqhubeke nokusilekelela ukuze sibophe abasolwa ngokususa uthuthuva eMoses Mabhida. Abanolwazi ngabasolwa mabathinte uCaptain Reddy ku-082 458 5630 noma uDetective Warrant Officer Mlungwana ku-082 662 7764,” kusho uNaicker.
Sebeyisithupha abantu ababoshiwe ngezibhelu zaseMabhida. Kubona kukhona uMnuz Phelelani Jojisa (34), Siphosenkosi Memela (35), Sibongiseni Khumalo (29) noKhwezilomo Madiba (35) abadedelwe ngebheyili kaR1 000 umuntu emunye.
Laba abanye bazobuyela enkantolo ngoMeyi 25.