Ibambe ngakho ngolwamavolontiya ezokuphepha eKZN
UMNYANGO wezokuPhepha KwaZuluNatal usuwethule uhlelo lokuqeqesha amavolontiya azolekelela ukulwa nobugebengu emiphakathini.
Ngempelasonto kuqeqeshwe amavolontiya angu-397 abeqhamuka ezifundeni ezahlukene zesifundazwe. La mavolontiya azoba yiso nezindlebe zamaphoyisa emiphakathini ahlala kuyo futhi azosebenzisana nazo zonke izinhlaka ezilwa nobugebengu lapho ekhona.
Nanoma ngabe yisiphi isinyathelo esithathwayo esingalekelela ekunqobeni ubugebengu obuhlalise lubhojozi izakhamuzi zaseNingizimu Afrika sisishayela ihlombe.
Izinga eliphezulu lobugebengu kuleli ngezinye zezinto ezihlehlisela izwe emuva. Okubi kakhulu ukuthi izigameko eziningi zobugebengu yilezi ezinodlame njengoba abantu bebulawa, bedunwa izimoto, begqekezelwa futhi bedlwengulwa mihla namalanga.
Yingakho nje sithi noma yimiphi imizamo engenziwa ukulwa nobugebengu siyayincoma futhi sifisa iphumelele.
Okunye okuhle ngale mizamo eyethulwe ngumnyango kaMnuz Mxolisi Kaunda ukuthi izosiza nanokuxosha ikati eziko kweminye imindeni ngoba ushilo ukuthi kukhona okuncane amavolontiya azobhekelelwa ngakho.
Kumqoka-ke nakho lokhu ngoba nemisebenzi ayikho ezweni lethu ngakho uma kunezinhlelo ezizosiza umphakathi kuhle kakhulu uma zikwazi nokuvula amathuba emisebenzi.
Sifisa-ke ukuthi amavolontiya awuhloniphe lo msebenzi awunikiwe futhi awenze ngokuthembeka nangobuqotho. Imvamisa izigebengu zisuke zaziwa emiphakathini eziqhamuka kuyona.
Sithemba ukuthi la mavolontiya aqokiwe angabantu abasenonembeza futhi ngeke angene ogibeni lokuluthwa ngemali yizigilamkhuba njengoba kuyaye kwenzeke kwamanye amaphoyisa.
Lolu hlelo lungazithela izithelo uma nje wonke umuntu ezobambisana futhi ahloniphe umthetho.
Isibalo esincane lesi okuqalwe ngaso uma kubhekwa ububanzi besifundazwe kodwa-ke siyethemba umnyango uzolikhulisa lolu hlelo ngokwandisa amavolontiya uma sekubonakele ukuthi lusebenza kanjani.