Umdlali we-United uthunwa ngoLwesine
UZOFIHLWA ngoLwesine umdlali weMaritzburg United, uLuyanda Ntshangase, oshone ngesonto eledlule ngemuva kokuhlala izinyanga esibhedlela ngenxa yokushaywa wumphezulu.
Imininingwane yenkonzo yomngcwabo kaNtshangase (21) iqinisekiswe usihlalo we-United, uFarook Kadodia, izolo emini.
Inkonzo izoba sePietermaritzburg City Hall ngo10 ekuseni.
“Siphatheke kabi ngokulahlekelwa uLuyanda obengumdlali obonakala esenekusasa eliqhakazile.
Ukhuliswe yiqembu kusukela emazingeni aphansi njengoba impilo yakhe isisheshe yaphela. Egameni leqembu sidlulisa amazwi enduduzo emndenini,” kusho uKadodia kwi-website yeqembu. UNtshangase, waseMbali, washaywa wumphezulu ngesikhathi iqembu elincane leTeam of Choice lidlala owobungani ezinyangeni ezimbili ezedlule.
Sonke lesi sikhathi ubesegunjini labagula kakhulu, obekuzwakala ukuthi walimala ebuchosheni.
“Akukho ebesisakuhlelile ngenkonzo yesikhumbuzo okwamanje ngenxa yokusondelana kwemidlalo. Nomngcwabo sibone kungcono ukuthi siwenze ngoLwesine ukuze kufike imidlalo sesidlulile kuwona,” kusho uKadodia.
Ngesikhathi kuvela izindaba zokudlula kukaNtshangase ngoLwesihlanu olwedlule, iqembu lamisa izinhlelo zokuziqeqesha. Izolo uKadodia uthe baqalile abadlali ukuzilolonga yize isimo sinzima.
NgoMgqibelo i-United izodudulana neLamontville Golden Arrows emdlalweni wokusonga i-Absa Premiership eHarry Gwala Stadium ngo-3 ntambama. Umdlalo ungobalulekile njengoba iTeam of Choice ilwela ukuqeda endaweni yesithathu kwi-log okokuqala emlandweni, okuzoyifaka kwiCAF Confederation Cup uma kwenzeka. Lo mdlalo uzolandelwa ngomunye oyingqophamlando leli qembu laseMphithi lidlala okokuqala kowamanqamu. Lizobambana neFree State Stars kowamanqamu weNedbank Cup ngoMeyi 19 eCape Town Stadium, eKapa.
Injabulo ye-United kule sizini ibilokhu ihambisana nosizi njengoba ekuqaleni kwayo kudlule emhlabeni omunye umdlali obethembisa weqembu leMultichoice Diski Challenge, uMlondi Dlamini engozini yemoto.