IDikwena ingase ithole ikhaya elisha
I-PLATINUM Stars ingase ifudukele kwesinye isifundazwe ngesizini ezayo ngenxa yokuthi igcine ngokugawulwa yizembe kwi-Absa Premiership ngokwamaphuzu enawo njengamanje.
IDikwena iyona ebambe ibhuleki kwi-log ngemuva kwemidlalo ewu-29. Ngokwezibalo iqembu livele seligawulwe yizembe kodwa lisahlalele ethembeni ngenxa yokuthi akwaziwa ukuthi icala likaTendai Ndoro we-Ajax Cape Town lizophetha kanjani.
Uma uNdoro etholakala enecala kungenzeka i-Ajax iphucwe wonke amaphuzu ewathole edlala kuyo. UNdoro usolwa ngokudlalela amaqembu amathathu ngesizini eyodwa. IStars isiqoqe amaphuzu awu-21. Isele ngamaphuzu awu-10 kwiUrban Warriors esendaweni yesibili kusuka ekugcineni.
URoger de Sa, esinye sezikhulu zeDikwena, uthe iqembu kungenzeka liyodlala kwesinye isifundazwe. “Sike sacabanga ngendaba esizozinza kuyo. Okuningi bekuncike ekutheni siyahlala esigabeni esikhulu noma sigawula yizembe yini. Ukwehlela kwethu ezansi sekuvule inqwaba yeminyango. Kumele sibheke ukuthi iyiphi indawo iqembu elizokwazi ukuhlala kuyo ngokukhululeka. Kumele sibheke ukuthi abaxhasi yikuphi lapho abazothanda sihlale khona.
“Yizona zonke izinto esizibhekayo. Njengamanje sinezindawo ezinhlanu esikhulumela kuzona. Sizoqhathanisa izinto eziningi ngaphambi kokuthatha isinqumo. Ngemuva komdlalo wokugcina wesizini, sizohlala phansi siqoke indawo esizokwazi ukuhlala kuyo.”
IDikwena kungenzeka iphelele eGoli noma eKapa.“Okuningi kuncike enkundleni esizojimela kuyona nenkundla esizodlala kuyona. Inkundla iRoyal Bafokeng akuyona eyethu, iphethwe ngabaseRoyal Bafokeng. Bekuyinkundla yeqembu kodwa manje sekungeyaseRoyal Bafokeng. Ukuseyibenzisa kumba eqolo. Uma uyiqembu elidlala kwiNational First Division kungamele usebenzise yonke imali yakho oyinikwa yiPSL ukuze ukhokhele iRoyal Bafokeng. Sisadlala kwiPremiership kodwa sisahluleka wukugcwalisa inkundla. Inkundla inkulu ukuthi ungakwazi ukumelana nezindleko zayo. Sisahlulwa wukuheha abantu abawu-500,” kusho uDe Sa.
NgoMgqibelo ngo-3 ntambama iDikwena izodudulana neBidvest Wits emdlalweni wayo wokugcina weligi eRoyal Bafokeng Stadium.
“Ngifuna ukwenza ngendlela efanayo nengenza ngayo kwiWits. Ngaleso sikhathi inkulisa yeqembu yayihamba phambili eNingizimu Afrika. Igama leqembu ngeke silishintshe,” kusho uDe Sa.
UDe Sa usazimisele ngokuqeqesha yize eyilungu lebhodi entsha yeStars. “Nginenkontileka, ngiqashiwe, ngiyazinikela futhi kumele ngilandele imibandela. Sinezifiso ezinkulu ngeqembu. Ngesikhathi sifika eqenjini besingacabangi nje ngobukhazikhazi bokudlala kwiAbsa Premiership. Besicabanga indaba yemfundo nangenkulisa egameni lebhola. Asizele imali lapha noma ukuzoziphakamisa. Ngesikhathi sithenga iqembu, bese livele lihlezi ekugcineni kwi-log. Ngifike iqembu lisadlale imidlalo emithathu, lingakaze linqobe futhi lingakaze lilishaye igoli. Asivelanga nje sathi asithenge iqembu ngoba sifuna ukuba sezindabeni. Iphupho lethu wukuba nenkulisa eqinile ezonika abadlali nethuba lemfundo. Sifuna ukufundisa intsha ngebhola nangempilo. Sinethemba lokuthi sizokwazi nokubayisa phesheya.”