Ukhala ngokushaya indiva ukuphepha
UMQEQESHI weMamelodi Sundowns uPitso “Jingles” Mosimane ukhala ngokungaphephi kwabaqeqeshi eNingizimu Afrika.
Sekuphenduke insakavukela ukuhlaselwa kwabaqeqeshi uma izinto zingahambi kahle emidlalweni ye-Absa Premiership. Muva nje uSteve Komphela obecija iKaizer Chiefs uphume ngesamagundane eMoses Mabhida Stadium, eThekwini, Amakhosi eguqiswa yiFree State Stars ngo 2-0 emdlalweni we-semi final yeNedbank Cup.
UMosimane utshele abezindaba ukuthi abanakiwe abaqeqeshi uma kukhulunywa ngezokuphepha UMDLALO wokugcina weKaizer Chiefs we-Absa Premiership uyinikeza ithuba lokuqeda isizini kukhona okubalulekile ekuzuzile ngale sizini engazange ihambe kahle uma kuziwa ezinkomishini.
IChiefs izovakashela i-Ajax Cape Town emdlalweni wokugcina eCape Town Stadium ngoMgqibelo ngo-3 ntambama.
Amakhosi ayibambe endaweni yesithathu kwi-log ngamaphuzu awu-45, okusho ukuthi adinga ukunqoba umdlalo ukuze azibekisele indawo kwiCAF Confederation Cup yangesizini ezayo. Ukudlala imiqhudelwano yezinhlangano zezwekazi, eNingizimu Afrika.
“Angifuni ukukhuluma ngepolikiti yokuthi amaqembu kumele amiswe imidlalo emingaki uma abalandeli bawo bengena enkundleni. Mina ngizokhulumela abaqeqeshi. Ngiyakhumbula ngalesiya sikhathi u-Augusto Palacios (obecija iPirates ngesizini edlule) ehlaselwa ngabalandeli. Ngavele ngasho ngathi le nto ayilungile kithina esingabaqeqeshi. Abantu bayasijaha. Kuthiwa imindeni yethu ayithini? Kwenzekile nakuSteve Komphela (kwiChiefs eMoses Mabhida Stadium). Yebo sekuke kwenzeka nakimina kodwa akuzange kube sezingeni likaSteve,” kusho uMosimane.
Ngesizini edlule uPalacios wathwala kanzima eZimnyama zilotsholwa yiMamelodi Sundowns ngo 6-0 eLoftus Versfeld Stadium, ePitoli, emdlalweni weligi.
“Ngabe yinto esiyisiko le? Kuthiwani ngendaba yokuvikelwa kwabaqeqeshi? Ngiyazi ukuthi nigxile kubalandeli nokunye. Akekho ozihlupha ngokuphepha kwabaqeqeshi. Wonke umuntu uza kithina. Beza ebhentshini laba bantu. Indaba yokuvikelwa kwethu imi kuphi? Sisengcupheni. Nami ngiyathandaza ukuthi ngingehlakalelwa yisimo esifanayo.
Ukuphepha kwabaqeqeshi kumqoka. Angifuni ukungena ngigxile kwenye ipolikiti kodwa uma kumele ngikhulumele uSteve noPalacois ngizokhuluma. Kwacishe kwenzeka kimina. Kwenzeka nakuJohan Neeskens lapha kwiSundowns nakwabanye abaqeqeshi,” kusho uMosimane.
UMosimane naye wasinda ngokulambisa eChatsworth Stadium edliwa yiLamontville Golden Arrows kumasizini amabili adlule.
“Uma yenzeka le nto yabaqeqeshi akushiwo lutho. Uma kuhlaselwa abaqeqeshi akushiwo lutho. Abantu bakhuluma ngokuphepha kwabalandeli. Ubani okhuluma ngokuphepha kwabaqeqeshi? Akekho, ngakho injalo nje indaba yethu,” kuphetha uMosimane.