Uzovalelisa ngowabakhaya umdlali okhonjwa kwiPirates
AKAWUVALI umlomo, umqeqeshi uClinton Larsen, ngokuzinikela kwiLamontville Golden Arrows nenhlonipho kuKudakwashe Mahachi ozobe edlala okokugcina ngoMgqibelo kuBafana Bes’thende ngaphambi kokuthi ayoqhubeka nempilo yakhe kwi-Orlando Pirates.
NgokukaLarsen uMahachi, odabuka eZimbabwe, uzobonakala kulo mdlalo yize engakazi ukuthi uzowuqala noma uzochibiyela ngaye yini. NgoJanuwari uMahachi utshele Isolezwe ukuthi nakuba eyithanda i-Arrows nakho konke emenzele khona ubengeke aliyeke ithuba lokuya kwiPirates ngoba ufunwa uRulani Mokwena oyiphini lomqeqeshi kweZimnyama.
Nakuba engafuni ukuphumela obala ngokuthi uya kuphi uMahachi, uLarsen uyavuma ukuthi uyahamba futhi akumphethe kahle lokho ngoba ubengumdlali athembele kuyena.
“Kubi nje ngoba uke wahlala isikhathi engadlali kule sizini kodwa ngijabule ukuthi uzolithola ithuba lokuvalelisa ngendlela efanele. Uyahlonipha uMahachi futhi ukuzinikela kwakhe, ngabe isemdlalweni kumbe ejimini, bekungangabazeki. Naye ubazi ukuthi uyena engimbiza kuqala esikimini sami. Uma sekufike isikhahti sokuthi umdlali akhule noma ashintshe umoya, siyiqembu elingami endleleni yakhe,” kusho uLarsen.
Lo mqeqeshi ukhuluma kanjena nje, umatasa namalungiselelo omdlalo wokuvala isizini neMaritzburg United ngoMqibelo ngo-3 ntambama, eHarry Gwala Stadium, eMgungundlovu.
“Ngesikhathi kuqala isizini besizibekele umgomo wokuthi siqede kwiTop 8 kumnyama kubomvu. SikwiTop 8 manje ngakho-ke ubumqoka bokuthola umphumela oncomekayo lapha abuchazeki. Okuhle ngayo yonke le nto ukuthi akekho esithembele kuyena ukuthi asenzele umsebenzi kepha konke kusezandleni zethu. Akekho ongazi ukuthi iMaritzburg inzima kanjani eHarry Gwala. Kuhluleke amaqembu ahlonishwa i-Afrika yonke ukuwina kuleya nkundla ngakho-ke siyakwazi esizokufica futhi sikulungele konke,” kusho uLarsen.
Ebuzwa ngokuthi ukucabanga ngefayineli yeNedabank Cup kwiMaritzburg kungaba usizo yini kubona uLarsen uthe: “Iningi labo abafana abancane ngakho ngeke ulindele ukuthi bacabange okuningi ngaphandle kwalo mdlalo abazobe bebhekene nawo. Lokhu kungaba usizo kubona kodwa futhi ngoba unobhutshuzwayo unjalo, kungaba usizo nakithina. Kuzoba umdlalo onzima kithina kodwa nathi izinga lokuzethemba likhulu ekhempini kwazise sisemgqigqweni omuhle wokunqoba imidlalo njengoba senzile kwemibili edlule.”