IChiefs isengazibekisela indawo kwiCAF
ngomunye yemibandela amaqembu athathwa njengamakhulu umhlaba wonke azibekela wona.
E-Europe kushukana amaqembu amakhulu anjengoReal Madrid, FC Barcelona (baseSpain), Juventus, Napoli (baseItaly), Manchester United noManchester City ( base-England) efuna ukuzibekisela indawo kwi-Uefa Champions League.
Amaqembu asalayo lapha alwa kanzima ezama ukubuyisa isithunzi sawo ebanga indawo kwiEuropa League njengoba kwenze i-Arsenal neChelsea e-England noma iValencia Spain.
Yize abanye bengeke bayibone iChiefs njengeqembu eliyithathela phezulu imiqhudelwano yeCAF kodwa ukuzibekisela indawo kwayo kulo mqhudelwano kuzosho ukuthi ingelinye lamaqembu aphambili ebholeni laseNingizimu Afrika.
Ngesizini edlule iChiefs, ebiphekwa nguSteve Komphela owesule ngenyanga edlule, ihlulekile ukuzibekisela indawo emidlalweni yeCAF. Iqede isizini yayo endaweni yesine ngamaphuzu awu-50.
Kulokhu inethuba lokwenza okungcono ngokuqoqa amaphuzu awu-48 emidlalweni ewu-30. Nokho uma ihluleka wukushaya i-Ajax, kungenzeka ivulelele intuba iMaritzburg United eyilandela ngamaphuzu awu-43.
Emdlalweni wokugcina ITeam of Choice izobhekana nabakhaya, iLamontville Golden Arrows, eHarry Gwala Stadium ngoMgqibelo ngo-3 ntambama.
EzaseMphithi zidinga ukunqoba lapha bese ziphuca iChiefs ithikithi lokuya kwiConfederation Cup. Uma womabili amaqembu eqeda elingana ngamaphuzu, iTeam of Choice ivunwa amagoli, okusho ukuthi ingayiketula iChiefs.
Nokho uma zihluleka lapha ezaseMphithi zizolithola elinye ithuba uma sezidlala owamanqamu weNedbank Cup neFree State Stars ngoMeyi 19. Umpetha walo mqhudelwano uzomela iNingizimu Afrika kwiConfederation Cup. Kule sizini amaqembu adlale kuyo, yiCape Town City neSuperSport United. Womabili ahlulekile wukubekisa indawo kweyamaqoqo eqhubekayo njengamanje.