Buyelapheka ubuhlungu obusesinqeni
KUNOBUHLUNGU obukhinyabezayo obuqhamuka lapha ethanjeni lesinqe, leli eliyisiphekepheke (ilium) ngemuva lithi chaphasha ngaphambili, lapha ngilibiza ngenqulu.
Kuphinde kube nala manxeba akugwaza ngaphambili esifubeni aze ayojikeleza nawe ngemuva eduze kwesiphanga.
Ngithi asikhulume ngalezi zinhlungu ezihluphayo ngoba ziyakhinyabeza kakhulu kubantu bakithi esibabona zonke izinsuku.
Ngicela sikhulume ngazo ngokuzihlukanisa ukuze sikhone ukuzicacisa:
IZINHLUNGU ZENQULU (ilium)
Leli thambo elisenqulu (ilium) liyingxenye yamathambo amathathu enza isinqe (pelvis) futhi yilona elikhulu kunawo womathathu; amanye alamathambo yilawa: yithambo elisandilingana elisezansi ekhoneni lesinqe eduzane nengoje enobulili bomuntu okuthiwa yi-(ischium) bese kuthi elesithathu yithambo elilapha ngaphambili eduze kwesinye okuthiwa yi (pubis). Ithambo lenqulu esikhuluma ngalo namhlanje likhona kuwo wonke umuntu, omdala nomncane.
Umbuzo uzothi yini lena eyenza ubuhlungu lapha enqulwini obusuka eceleni komgogodla kuhambe njalo kuze kuyofika ngasemvilaphini futhi kuyenzeka lezi zinhlungu zijikeleze nezinqe (buttocks) ngakwesobunxele nakwesokudla?
Le minjunju iyaye yehle nemvilaphu iyofika ngasengojeni yezinqe lokhu kuvele kwenze kunganyakazeki, kwabanye ubuhlungu behla nomlenze buye edolweni nasonyaweni; uma kungasukanga enqulwini kwaya esinqeni uqobo kukundlandlathe kusho kube nzima ukuhlala ngezinqe.
Lapha kube ubuhlungu obujikajika nezinqe, benza kuze kube nzima ukuhlala ngazo. Lobu buhlungu bezinqe behlela emazansi buye ngasekupheleni kwazo, ukusuka lapho sekuyogijima njalo kuye edolweni kubambeke imisipha yedolo ingathi iyaqinelena, ubuhlungu buze buyotheleka cababa ezinyaweni.
Lezi zinhlungu esikhuluma ngazo: Ziyagwaza zibe yimikhonto Zishise kungathi kubasiwe Kube nenkwantshu Umlenze ukhonkeke Omunye uzozibuza ukuthi ibe iyini imisebenzi yenqulu (ilium)? Ake siyibheke: ■Sizovumelana ukuthi inqulu ixhasa iqedele ukuma kwesinqe (pelvis) yenze ukwakheka komzimba kube okuyikhona
Izicubu zezinqe (buttocks) zinamathele khona
Izicubu ezibambe umgogodla nazo zidlula khona
• Imisipha enhlobonhlobo, imithambo, imizwa konke kujikeleza nakhona. Yini pho lena ezodala ubuhlungu kulesi sithombe sendalo esibukeka sisihle kanje?
Ukuxega kwezicubu, zibe ntekenteke. Hhhhm, yini le eshiwo ngudokotela? Yebo, asikhumbule ukuthi uMdali wenza yonke into esemzimbeni yanamathela futhi yamathelana kahle kwathi ne.
Ake sithi manje isisu, imihlubulo, izinqe zonke lezi zicubu seziyaxega. Isisu sixegela siwele enqulwini, imihlubulo ixegela enqulwini idonse umgogodla, izicubu zezinqe uma sezixega zidonsa lona leli thambo lesinqe eliyinqulu. Uyabona yini-ke manje ukuthi inqulu izothwala kanzima isidonsadonseka ngoba omakhelwane sebeshintshe indlela abebeme ngayo?
Okwesibili lapha ukuxega kwezicubu kungapitshiza imithambo nemizwa uqobo. Lokhu kuletha izinhlungu ngendlela eyisimanga, kube nenkwantshu kuze kubopheke izicubu.
Ukulimala nokuhuzuka kwezicubu ezakhele inqulu. Uma isicubu silimele, kuyenzeka kuthi uma ukuphola le mihuzuko kubophele ndawonye nemizwa bese kuba nobuhlungu obukhulu obungabekezeleleki, obuyohlala bubanike endaweni eyodwa njalo.
Ukulimala nje okuqondile kwenqulu
Ukuhuzuku nokulimala komsipha ohlanganisa amathambo omgogodla ezansi nawo nenqulu(sacroiliac). Kuningi okungahuzula leli joyinti njengoba linomsebenzi obalulekile wokuvumela umzimba ukwazi ukujika, ugobe, ugijime, njalo njalo.
Ukuhuzuka nokulimala komsipha oxhumanisa inqulu nomgogodla (iliolumbar).
Lapha uvele umuntu abe nobuhlungu besinqe, imvilaphu, ubuhlungu buze bufike ezicubini zendawo yokuzikhulula( rectal), kube nokuvuvukala emgogodleni nasenqulwini, ube nobuhlungu obukhulu uma kade usuhleli isikhathi eside noma uzikhulula.
Kwesinye isikhathi ubuhlungu bubangwa ukukhuluphala kakhulu kwabanye kuba ukugqoka izimpahla ezimpintshayo ngenxa yokuthi kucindezeleka le mizwa ewuxhaxha ebesithe ikake inqulu; ingcindezi lena idala izinhlungu ezinkulu kwesinye isikhathi kungathi zishisa nedanda lesinqe sonke.
Zonke lezi zinhla zokugula nezinhlungu zakhona kuyelapheka futhi kuphele, kokunye kudinga ukuthi lowo ogulayo athole imijovo engena ngqo endaweni ebuhlungu isikhathi esiyibangana elithile. Asingahlali sigogwe ubuhlungu size sikhubazeke, ngesimo eselaphekayo umuntu aphile.
Okumele sikwenze ukunamathela kodokotela bethu, umtholampilo uhamba usheshe uphele eduze kulezi zimo.
Asisakwazanga ukukhuluma ngamanxeba agwaza esifubeni ngemuva nangaphambili namhlanje, siyoqhubeka sikhulume ngalezi zinhlungu ngokuzayo.
Mpilonde!