Umile ukufunda ephoqwa yizinhlungu zomthungo
IZINHLUNGU zomthungo ezilokhu zimbelesele njalo seziphoqe owesifazane (21) owenza uGrade 11 ukuthi ame kancane nokufunda.
Sekuphele izinyanga uQondisile Mthembu waseMlaza engasayi esikoleni ngenxa yezinkinga zomthungo emuva kokuthi ehlinzwe eyobeletha ePrince Mshiyeni Memorial.
UQondisile uthe ubelethe ngo2016 kodwa kuze kube manje usahlushwa yizinkinga zomthungo athe sezimphoqe ukuthi ame esikoleni ngenxa yezinhlungu.
Uthe nangonyaka odlule ugcine esengenzi kahle ngenxa yokuthi wayephoqeleka ukuthi elokhu ehlala ekhaya ngenxa yobuhlungu bomthungo.
Ngenyanga edlule uye ePrince Mshiyeni Memorial lapho befike bawubona umthungo base bemdlulisela esibhedlela Inkosi Albert Central. Kulindeleke ukuthi aye khona ngoMeyi 22.
Uthe inkinga yakhe iqale ngokuthi angabe esakwazi ukuhamba kahle ngenxa yezinhlungu ezidalwa yizinkinga zomthungo.
“Ngiye eMshiyeni ekuqaleni kukaEphreli kodwa abazange bangihlole bavele bathi bangidlulisela eNkosi Albert Luthuli kodwa banginika usuku olukude. Njengoba ngisalindile nginezinkinga zezinhlungu ezenza kube nzima nokuthi ngiphakame,” kusho uQondisile.
Uthe ubuhlungu sebuholele ekutheni avakashele emtholampilo oseduze kwakhe nawo othe ngeke ukwazi ukumsiza wambuyisela khona eMshiyeni kodwa wafike watshelwa ukuthi akalinde usuku lokuya eNkosi Albert Luthuli.
Uqhube wathi okwenza afise sengathi angasheshe athole usizo wukuthi usevame ukopha ngokweqile ebuntwini bakhe selokhu eqale ukuba nezinhlungu. Okhulumela uMnyango wezeMpilo KwaZuluNatal, uNksz Ncumisa Mafunda, uthe abakwazi ukudalula iminingwane yeziguli kwabezindaba ngoba lokhu kuyimfihlo ephakathi kwazo nabasebenzi bezempilo. “Nokho emuva kokuthi uMnyango uthintwe yiphephandaba, ube sewuxhumana nesibhedlela esithintekayo nesike sabona isiguli phambilini kuleli sonto. Emuva kwalokho, isibhedlela sixhumane nesiguli sasicela ukuba sibuye namuhla ukuze siqhubeke nokuxilongwa kuthathwe isinqumo esifanele.
UMnyango ufisa ukugqugquzela iziguli ukuba zibuyele ezikhungweni zezempilo uma zingabi ngcono emuva kokubonwa abezempilo. Lokhu kuyilungelo lazo,” kusho uNksz Mafunda.