Isiqongqwane seBucs sihlose lukhulu kwezayo
INJINI ye-Orlando Pirates, uMusa Nyatama, ifuna ukuyivala ngenothi eliphezulu isizini ka-2017/2018 ye-Absa Premiership esongwa ngempelasonto.
IPirates izokwamukela iFree State Stars e-Orlando Stadium, eGoli ngo-3 ntambama. IBucs iya kulo mdlalo isivele izibekisele indawo yesibili kwi-log, okuhambisana nokuyodlala kwiCAF Champions League ngesizini ezayo.
Lokhu kungemuva kokuthi iMamelodi Sundowns ikhale yemuka nesicoco emasontweni amabili adlule, ishaya i-Ajax Cape Town ngo 3-1.
Lo mphumela uqede konke ngamathemba eZimnyama okuthi umbango ufike emidlalweni yokugcina njengoba nazo zishaywe iCape Town City. UNyatama ngomunye wabadlali abasha kwiPirates kule sizini esongwayo, abafike bagqama njengoba leli qembu laseMayfair “belivuswa” ngokusho komqeqeshi walo uMilutin “Micho” Sredojevic, emuva kokuqeda endaweni ka-11 ngesizini edlule. “Sizobuyela emuva siyosebenza kanzima. Sidinga ukunqoba umdlalo wethu wokugcina siqede ngenothi eliphezulu,” kusho uNyatama kwiSuperSport. “Siyababongela (iSundowns) ngokunqoba. Bebelokhu beshayela phezulu yonke isizini, kubafanele ukunqoba. Bakusebenzele. Thina sizoya kolanda amandla sibuye sesiqinile ngesizini ezayo.” UNyatama ufike waba yinsika yeBucs eyishayela namagoli amqoka. Usenqobe cishe imiklomelo eyisithupha yomdlali wosuku ovelele kule sizini.
NgoMashi uqokwe waba ngumdlali ovelele wenyanga. Lo mdlali oke wayibamba kwiBloemfontein Celtic, Maritzburg United nakwiMamelodi Sundowns, uke watshela i-www.orlandopiratesfc. com ukuthi ukuzithoba yikhona okumenza umdlali asewuye.
“Ngicabanga ukuthi izinto ziqale ukushintsha ngesikhathi ngamukela ukuthi kusekuningi okumele ngikufunde. Ngizimisele ngokuhlale ngifunda uma siziqeqesha bese lokho ngikusebenzisa emidlalweni,” kusho uNyatama.
Ngemuva kokuhamba kuka-Oupa Manyisa, uNyatama ubezobanga indawo noThamsanqa Sangweni, Issa Sarr no-Abbubbaker Mobara kodwa bonke abasizwa ngendaba isikimu.
Ukufika kukaMicho noRulani Mokoena bezoba ngabaqeqeshi abasha beBucs kuyivusile yenza kangcono kunesizini edlule. Okushiwo uNyatama ukuthi bazobuya ngamandla ngesizini ezayo, kufanele ukuthi bayakukholwa abalandeli beqembu uma kubhekwa indlela ebelidlala ngayo kulena esongwayo.