Ngeke ibe khona iCarling Cup nonyaka
KUBHUNTSHE umdlalo wabakhaya baseSoweto wokuqala wesizini ezayo emuva kokuhlehliswa kweCarling Black Label Champion Cup eba njalo ngoJulayi phakathi kweOrlando Pirates neKaizer Chiefs.
Umdlalo osubekhona minyaka eyisikhombisa edlule eFNB Stadium ngeke ube khona kulo nyaka, ngokusho kwesitatimende esikhishwe abaxhasi.
Ngokusho kwabaxhasi babone kungcono ingabi khona iBlack Label Cup ngoba ibizoshayisana nezinhlelo negatsha labo elisha i-AB InBev lona elikhiqiza iBudweiser the King of Beers okuyiyona exhase iNdebe yoMhlaba eseRussia kusukela ngoJuni kuze kube uJulayi.
Lokhu kuxhumana kwabaxhasi beBlack Label Cup negatsha labo elisha kwenze kwavunyelwana ukuthi wonke amandla awafakwe ekufafazeni iNdebe yoMhlaba ngokuhambisa phambili iBudweiser ngoba vele iyona okufanele ibe semehlweni abantu uma kuqhubeka umqhudelwano okungasensuku zatshwala ukuthi uqale kwelikaVladimir Putin.
“Sikuqonda kahle ukuphoxeka okuzoba khona kubalandeli bethu ngenxa yokuhlehla kweBlack Label Cup ngoba ingesinye sezizathu abathandi bebhola abaningi abazisebenzisayo ukuya enkundleni sebehluleka ukulinda ukuqala kwesizini entsha. Njengoba iBudweiser isingaphansi kwethu nje, ngeke sikwazi ukukuziba lokho ngoba neNdebe yoMhlaba nokuhlangana kwethu kumqoka,” kusho uGrant Pereira, isikhulu esiphezulu sakwaCarling Black Label.
Uqhube wathi ngendlela osebuqine ngayo ubudlelwano babo nabathandi bebhola eNingizimu Afrika, baphoqelekile ukuthi kube khona abakwenzayo ngokushesha.
“Uma kuqala isizini entsha kukhona esizokumemezela esizokwenza ngokusebenzisana nePremier Soccer League (PSL). Abathengi bethu okungabalandeli bebhola bazobhema bakholwe uma sesizindlala obala izinhlelo esinazo nePSL. Lokhu kuzobe kuwathinta wonke amaqembu adlala esigabebeni esikhulu. Okunye engingakusho wukuthi abalandeli abalindele iBlack Label Cup ehlukile futhi enezinongo eziningi ezingaziwa ngo-2019,” kusonga uPereira.
Emdlalweni odlule weCarling Black Label Cup ngo-2017 kugcine kuwine iChiefs ngo 1-0 wegoli likaBernard Parker. Ngo2016 kwakuwine yona futhi iChiefs ngo 2-0.