Isilikhiphile igunya iPSL ngoweDowns neBarcelona
I-PREMIER Soccer League (PSL) igcine iqinisekisile ukuthi iyinikezile igunya iMamelodi Sundowns lokuthi ibe nomdlalo wobungani neFC Barcelona yize isizini yakuleli isaqhubeka.
I-PSL izolo emini ikhiphe isitatimende lapho ibiveza ukuthi ibone kungcono ukuthi iwuvumele lo mdlalo ngoba uzobe uyingxenye yezinhlelo zokugujwa kweminyaka engu100 kwazalwa uNelson Mandela ongasekho.
Ngesikhathi kuvela lezi zindaba ngempelasonto ngomengameli weSundowns, uPatrice Motsepe, kuqubuke umbuzo othi uzoqhubeka kanjani umdlalo ekubeni isizini yakuleli ingakapheli. Obekususa lokhu wukuthi ngo-2013 iPSL yavimba i-Ajax Cape Town neLiverpool, izeseka ngokuthi ayivumelekile imidlalo yobungani namaqembu angaphandle uma isizini isaqhubeka. Yathi lo mgomo wabekwa ngoba akufanele kuphazamiseke abaxhasi bePSL nemidlalo yayo, kunakwe owezivakashi.
Umdlalo kuthiwe uzokuba ngoMeyi 16 eFNB Stadium, eGoli. Amathikithi azoqala ukudayisa ngoR40. Ukushayisana nekhalandela lePSL kudalwa wukuthi nakuba imidlalo yeligi izobe isisongiwe kodwa kuzobe kusenomdlalo wamanqamu weNedbank Cup ongoMeyi 19. Nemidlalo yokuhlunga yeNational First Division iyaqala ngoMeyi 16.
“Lesi sicelo besingaphezulu kokujwayelekile njengoba siyingxenye yemigubho yeminyaka engu-100 yokukhumbula uMadiba. Ngaphezu kwalokho sithole ukwesekwa ngabaxhasi bethu iNedbank nohulumeni ngenxa yokubaluleka kwakho njengoba ibhola lineqhaza ekuhlanganiseni abantu baseNingizimu Afrika. Ikomiti eliphezulu leligi lisivumile isicelo ngokuhambisana nayo yonke imigomo yeCAF neyeFifa, nokugcizelela ukuthi iSundowns izolandela yonke imibandela yeSASREA,” kusho isitatimende.
I-SASREA okuwumthetho iSafety at Sports and Recreational Events okumele kuqinisekiswe ukuthi zonke ezokuphepha zimi ngomumo ngosuku lomdlalo, ukuze kungasuki izibhelu ezifana nezenzeka eMoses Mabhida Stadium, eThekwini.
Izolo bekulindeleke ukuthi iFC Barcelona iqinisekise ngalo mdlalo esithangami sabezindaba. Kodwa kuze kwashaya isikhathi sokushicicelela kungakenzeki lokho.
Okunye obekungakacaci izolo wukuthi ngabe inhlangano eyengamele ibhola e-Afrika, iCAF isiwuhlehlisile yini umdlalo weSundowns weCAF Champions League okuhlelwe ukuthi ube ngoMeyi 15.