UCele usola amaphoyisa ngokulala emsebenzini
UNGQONGQOSHE wamaPhoyisa, uGeneral Bheki Cele, usola ithimba lamaphoyisa elijutshwe ukuba liphenye ngokubulawa kosopolitiki KwaZuluNatal nezobuNhloli ngokulala athi kwenza kuqhubeke ukubulawa kwabantu.
Ekhuluma nabezindaba esiteshini samaphoyisa eMargate izolo ngemuva kokuhlangana nabaholi bamathimba aphenya ngokubulawa kosopolitiki, uCele uthe akaneme ngendlela ithimba elisebenza ngayo.
“Kumele ngikusho kucace ukuthi angeneme neze ngendlela okusebenza ngayo ithimba elijutshwe ukuba liphenye ngokubulawa kosopolitiki. Uma ubuka ithimba alehlukile kwiReal Madrid ngendlela elithakwe ngayo kodwa umsebenzi walo awujabulisi,” kusho uCele.
Ukhathazekile ngokubulawa kwabantu esifundeni iLower Soath Coast, Moses Mabhida naseHarry Gwala.
“Kumele ithimba lithi ukuqiniswa ngoba akufanele ukuthi kubulawe abantu bese kucweba iziziba. Kunamacala amadala amaningi okubulawa kwabantu okungakaze kuboshwe muntu ngawo,” kusho uCele.
Uthe akangabazi ukuthi kuhlobene nezombusazwe ukubulawa kukaMnuz Sifiso Cele (42) obenguMgcinimafa egatsheni le-ANC oShabeni.
Uthe ukuthathwa kwamaselula nemali ngesikhathi ebulawa bese kuwukudukisa umkhondo wokuthi ukubulala kuhlobene nezombusazwe.
“Lapha ePort Shepstone yingakithi, ngeke ngihlale ngisonge izindla ngibe ngibona abantu bephela,” kusho uCele.
Uphinde wakhala ngezobuNhloli. “Isikhalo ngezobuNhloli sidala kodwa siyathemba ukuthi iNhloko entsha yazo izokwenza ukuthi uphiko lusebenze iphinde ikhuculule bonke abantu abangenzi umsebenzi abawuqashelwe.”
Usuke esiteshini samaphoyisa eMargate wavakashela umndeni kaCele ephelezelwa wubuholi be-ANC esifundeni iLower Soath Coast.
Ufike wathembisa umndeni kamufi ukuthi ngeke baze baphumule ababulali bengabanjiwe.
UNobhala we-ANC kulesi sifunda, uMnuz Mzwandile Mkhwanazi, unxuse amalungu enhlangano ukuba angalokhu eqagela ngembangela yokubulawa kukaCele kodwa ayekele amaphoyisa ukuba enze umsebenzi wawo.
UMkhwanazi uthe bakhathazekile ngokwenyuka kwesibalo samaqabane abulawayo esifundeni sabo. “Okusikhathaza kakhulu wukuthi kwezinye zezehlakalo abekho abantu ababoshwayo.”
Uvumile ukuthi kukhona ukungaboni ngaso linye okukhona kumalungu enhlangano esifundeni sabo. “Ubuholi bukazwelonke bufikile lapha buzohlola isimo bathola ukuthi kunezinkinga okumele zilungiswe, yingakho kuphakanyiswe nokuthi ingqungquthela yesifunda kumele ime kancane,” kusho uMkhwanazi.
Uthe izinkinga ezikhona esifundeni sabo yilezo ezejwayelekile enhlanganweni okubalwa kuzo ukuncishwa kwabantu ubulungu benhlangano.
Asemabili amalungu e-ANC asebulewe esifundeni iLower South Coast esikhathini esingaphansi kwamasonto amathathu kulo nyaka kodwa aseyisithupha esewonke esifundeni kule minyaka edlule.
Emasontweni amabili edlule kubulewe uNkk Nombuso Mqadi, ngoMsombuluko kubulawe uCele. Womabili amalungu abulewe ngendlela efanayo engenelwe ezindlini.
UCele uzofihlwa ngoMgqibelo ekhaya ngemuva kwenkonzo ezoba sehholo lomphakathi.