Zizoqina ezokuphepha kwezokuhlala eMangosuthu
KUZOQINISWA ezokuphepha kuzona zonke izindawo ezihlala izitshudeni zaseMangosuthu University of Technology (MUT).
UShansela wakule nyuvesi uDkt Duma Enoch Malaza usho lokhu izolo esithangamini nabezindaba enyuvezi. Uthe bazoqinisekisa ukuthi zonke izindawo zokuhlala izitshudeni sezizoba nemishini ekwazi ukubheka kuthi abangenayo abaziphethe yini izikhali. “Sesikhiphe umyalelo kuzo zonke izindawo zokuhlala izitshudeni ukuthi kufakwe ama-metal detectors (imishini yokusesha) nemishini ekwazi ukubona uma umuntu engena nesikhali,“kusho uMlaza. Lesi sinqumo sithathwe emuva kokuthi kudutshulwe kwabulawa kwesitshudeni sakule nyuvesi uZolile Khumalo (22) , ebesenza unyaka wokuqala ezifundweni zeQuantity Surveying, okusolwa isoka lakhe abesehlukene nalo ngakho.
UMnuz Thobani Mnisi kuthiwa wangena nesibhamu ngokungekho emthethweni endaweni okuhlala kuyo izitshudeni eLonsdale, eThekwini.
IPhini likaShansela wenyuvesi uSolwazi Nokwethu Ndlazi lithe bayathemba ukuthi ezinsukwini ezimbalwa bazobe sebezilungisile ezokuphepha kuzo zonke izindawo ezihlala izitshudeni, ikakhulukazi ezingaphandle kwenyuvesi.
UMnuz Sizwe Nkabinde ophethe ezokuphepha enyuvesi, uthe baqashe abaphenyi abazimele abazokwenza uphenyo ngezokuphepha kuzo zonke izindawo ezihlala izitshudeni kule nyuvesi.
“Sisungule ikomiti, okubalwa nabaphenyi bangaphandle abazokwazi ukusisiza ngalolu phenyo ukuze kugcine kuvelile ukuthi yini eholele ekutheni kwenzeke lesi sigameko, ukuze kubhekwe nokuthi yini eyenza ukuthi ezokuphepha zingaqini,” kusho uNkabinde
Uqhube wathi bazohlangana nomndeni wesitshudeni esibulwe ngoLwesine njengoba kuzobe kunenkonzo yesikhumbuzo sakhe eSeme Hall khona enyuvesi. Ngokusho kukaNkabinde inyuvesi izokhipha amabhasi ayisithupha azohambisa izitshudeni emngcwabeni ozoba ngoMgqibelo.