Umsolwa nokwebiwa eMabhida
OMUNYE wabasolwa ngokususa uthuthuva eMoses Mabhida Stadium emdlalweni weKaizer Chiefs neFree State Starts kwiSemi Final yeNedbank Cup ngenyanga edlule, ubesebenzisa ama-head set ne-microphone akweba enkundleni, ekusebenzisa ukubuza amalungu omphakathi waseMaphephethweni, eNanda.
Umfundi ka-matric uCebolendoda Hadebe (21) uvele enkantolo yaseThekwini izolo nabanye abasolwa ababili uMnuz Douglas Mhlaliseni Mkhize (42) noLungisani Jaca (33).
Babhekene namacala amathathu, elokuba nodlame emphakathini, elokungena enkundleni ngaphandle kwemvume nelokuhluleka ukulandela imiyalelo yabomthetho.
Badedelwe ngebheyili kaR1000 umuntu emunye, bazobuya enkantolo ngoMeyi 25, sebehambisana nabanye abasolwa abane ababhekene namacala afanayo.
Umshushisi uMnuz Calvin Govender utshele imantshi uMnuz Mahomed Motala, ukuthi uCebolendoda ubezisebenzisela izinsizakusebenza zakwaSupersport emphakathini, ehamba ephonsa imibuzo kubantu baseMaphephethweni, ngaseNanda.
Imantshi ivele yaphela insini, yabuza sakubhuqa ukuthi ngabe umsolwa ubebuza umphakathi ukuthi kwaba yini imbangela yokuba iKaizer Chiefs ihlulwe kulo mdlalo.
UGovender uveze ukuthi ngokophenyo olusenziwe, uMkhize yena washaya ngensimbi imishini yokuqopha yakwaSupersport.
UJaca yena kuvezwe ukuthi wayeyingxenye yeqeqebane labantu elaqala umlilo.
Ummeli wesihle wabasolwa, uNksz Anele Mveku uthe uMkhize noCebolendoda bazimisele ukuvuma amacala kodwa uJaca uyakuphika okuvezwa wuphenyo ukuthi washisa umlilo ngoba yena wayezimele neqeqebana elalicula eMabhida.
UMotala uncome kakhulu uyise kaCebolendoda njengoba kuvele ukuthi wuyena oveze indodana yakhe, waletha nezinto eyayizebile amaphoyiseni.
Laba basolwa badonswe ngendlebe ukuba bangalinge balubhade ezinkundleni zemidlalo beyothamela imidlalo, kuze kube kuphothulwa icala. Uma bephula lowo myalelo, kuthiwa bayophucwa ibheyili bese befakwa esitokisini.
Abemindeni yabasolwa bebekhona enkantolo kodwa banqabile ukukhuluma nabezindaba.
Khona manjalo izolo amalungu ePhalamende aphakamise ukuthi abazolahlwa amacala okuba nodlame emphakathini, ezinkundleni zemidlalo kumele bavalwe unomphela ukuba bangaphinde balubhade ezinkundleni zemidlalo.
Usihlalo wekomiti lezemidlalo nezokugcebeleka uNksz Beauty Dlulane usho kanje emuva kombiko othulwe amaphoyisa, abePremier Soccer League (PSL), iSA Football Association (Safa) nenkampani ezimele yonogada, obumayelana nomdlalo owawuseMoses Mabhida ngoEphreli 21.
Kulesi sigameko kwalimala abantu abangu-21, okubalwa abangu-15 ababeyizethameli.
Usihlalo wePSL uMnuz Irvin Khoza uthe uyahambisana nombono othi bajeziswe ngokuvalwa ezinkundleni abatholwa benecala.
Umkhuzi wamaphoyisa kuleli uGeneral Khehla Sitole uthe kunesidingo sokubhekisisa imithetho elwa nobudlova babalandeli ezinkundleni.
Ngaphezu kwalokho uNgqongqoshe wezeMidlalo uNksz Tokozile Xasa usefake isicelo sokuba uMengameli uMnuz Cyril Ramaphosa asungule ikhomishini ezophenyisisa ngodlame emphakathini, olwenziwa ngabalandeli ezinkundleni zemidlalo.