Kuzophenywa ngolwezingane ehostela
SELUZONGENELELWA uMnyango wezeMpilo nowezokuThuthukiswa koMphakathi KwaZuluNatal udaba lokuhlala kwezingane ehostela labesifazane, uMasipala weTheku othi lokhu kuphambene nesimo sempilo yazo.
Izolo iNkantolo eNkulu eThekwini itshele abameli bezinhlangothi zombili ezithinteka kulolu daba ukuthi bathintane nale minyango ukuze iphenye ngesimo senhlalo yezingane kuleli ehostela elibizwa ngeThokoza. Umasipala ukhala ngokuthi leli hostela alilungele ukuhlala izingane futhi ligcwele. Abesifazane abahlala kulo, izolo bathe bancamela ukuhlala nezingane zabo ngaphandle kwaleli hostela elisemgwaqweni uYusuf Dadoo eThekwini, uma inkantolo igcina ibalahla.
Ijaji lithe yize lizizwa izikhalo zomama abangafuni ukuhlukaniswa nezingane zabo, azikulungele ukuhlala kuleli hostela. “Nisho ukuthi ingane yomfana eneminyaka engu-16 kuhle ukuthi isebenzise indlu yokugeza nabesifazane nezinye izingane zamantombazane?” kubuza ijaji.
Lithe ngeke kulunge nokuthi kuvunyelwe kuphela izingane zamantombazane ukuhlala nonina ngoba kuzobe kuncisha ilungelo ezabafana. Liyalele abameli ukuthi namuhla babuyele kulona ukuzobhunga ukuthi bazoyimisa kanjani eyokufaka iminyango kulolu daba. Liphakamise nokuthi le minyango inikezwe okungenani izinyanga ezimbili ukuze iphenye ngesimo sasehostela. Icala lizobuyela enkantolo ngoLwesihlanu.
U-Advocate Sarah Jane Linscott omele abahlali, ukwamukele ukuthi kuthintwe iminyango kodwa wakhala ngokuthi sekuyisikhathi eside umasipala ungenazinhlelo ngalolu daba njengoba lwangena enkantolo ngo-2015.
Omama bebephume ngobuningi, abanye bebehamba nezingane zabo. Bekukhona nabahlali bamanye amahostela abazwelana nomama baseThokoza.
UNksz Phumzile Mpontshane usehlale eThokoza kusukela ngo-2002, unezingane ezimbili eneminyaka ewu-10 neno-2. Uthe ngeke akwazi ukuhlukana nezingane zakhe njengoba sekwande ukuhlukunyezwa kwazo. Uthe angenza noma yini ukuze avunyelwe ukuhlala nezingane zakhe.
UNksz Zakhona Radebe onamadodakazi amabili eno-4 no-12, uthe akazimisele ukuya ndawo futhi uzohlala nezingane zakhe. Uthe uma umasipala ubakhipha awubafunele izindlu abazohlala kuzo nemindeni. Udaba lombango wezingane kuleli hostela lwangena enkantolo ngo-2015. Omama bebekhala ngokuthi bayazishushumbisa ngenxa yokuthi azivunyelwe ukuhlala.