‘Ngeke sixhamazele ngolomhlaba’
UMENGAMELI Cyril Ramaphosa uthe ukubuyiswa komhlaba ngaphandle kwesinxephezelo yinto ebucayi ezokwenzeka ngaphandle kokusabisa abatshalizimali nokuwisa umnotho wezwe.
Izolo uRamaphosa ephendula umholi weDA , uMnuz Mmusi Maimane obekhala ngokuthi lolu daba luzosusa uthuthuva luxoshe nabatshalizimali.
“Abantu abafuni wonke umhlaba okhona kodwa bacela ukunikwa ingxenye ethile njengoba babethenjisiwe ngo-1955 ukuthi umhlaba kuzoba ngowabo bonke abantu baseNingizimu Afrika. Ngeke kuthikamezeke umnotho uma kubuyiselwa umhlaba kubantu, wudaba olubucayi kabi lolu ngeke sixhamazele uma silusebenza,” kusho uRamaphosa.
Uphinde waphonsela amalungu ePhalamende inselelo ngesikhathi ecela ukuthi lawo angafuni ukuthi umhlaba ubuyele kubantu abasukume, nalabo abangafuni ukuthi abantu bakhelwe izindlu mabasukume. Akuzange kusukume muntu. Utshele uMaimane ukuthi bazomeseka odabeni lokulwa nokucwaswa, wukungalingani nokubuyiswa komhlaba beyi-ANC.
Bezikhona neziqubu zokuphazanyiswa kwePhalamende ngesikhathi uRamaphosa nePhini lomholi we-EFF uMnuz Floyd Shivambu bephikisana ngokuthi yi-ANC eyafika nombono wokuthi umhlaba mawubuyiselwe kubantu kodwa i-EFF isiyenza sengathi iyona eyeza nawo.
URamaphosa uphinde wacela uSotswebhu weDA , uMnuz John Steenhuisen ukuthi akathule ngesikhathi efuna ukuphendula umbuzo kaMaimane ngodaba lweNational Minimum Wage.
“Awuthule , ngiyakucela bandla uthule ulalele ngoba ngifuna ukuphendula umbuzo kaMaimane,” kusho uRamaphosa.
USteenhuisen ukhale ngokuthi uRamaphosa akakhulumi ulimi lwasePhalamende uma ethi akathule.
USihlalo uMnuz Cedric Frolick ucele ukuthi uRamaphosa ahoxise inkulumo yokuthi uSteenhuisen athule, nempela wahoxisa.
Uthe uR3 500 awulona iholo elifanele abasebenzi kodwa kufanele kuqalwe kancane ngoba nakwamanye amazwe abale kuwo iBrazil liyasebenza.
Uphinde waveza ukuthi akanankinga nokuthi kuvulwe iBhange loMbuso, elaselokishini elizoboleka imali abantu besifazane kuyekwe ukusetshenziswa amabhange amakhulu kuphela.