Sincoma uSemenya ngokudelisa labo abanomona ngaye
UMA bonke abantu ababhekana nobunzima empilweni bengaba nesibindi njengomgijimi uCaster Semenya, isizwe sethu besingahluka kakhulu.
USemenya usehlukumezeke kakhulu selokhu aqala ukugqama kwezokusubatha emhlabeni kodwa akabanaki bonke labo abazama ukumthunaza nokufenyisa umsebenzi omuhle asewenzile. Kunalokho lo msubathi ka-800m no-1500m uvele abancamise ngokushaya into ecokeme enkundleni labo abalwa naye.
Ngeledlule i-International Association of Athletics Federations (IAAF) ishaye umthetho othi uSemenya nabanye abagijimi abasesimeni esifuze esakhe kuzomele badle imishanguzo ezokwehlisa ukukhiqizeka kwe-testosterone emizimbeni yabo uma bezimisele ngokuqhubeka kula mabanga (800m no-1500m). Uma bengazimisele ngokudla amaphilisi kuzomele benyukele kwi-5000m kuya phezulu.
Abaningi babone lokhu njengendlela yokuhlasela uSemenya. I-IAAF ishaye umthetho uSemenya ebheke kwimpelasonto abezogijima kuyo i-1500m emlenzeni wokuqala weDiamond League, eDoha.
Njengokujwayelekile, uvele wenza into yamehlo ngempelasonto ephula irekhodi lakhe kwi-1500m ebelingu-4:00.71 aliqophe kumaCommonwealth Games e-Australia ngenyanga edlule. Ushaye u-3:59.92 eshiya uNelly Jepkosgei waseKenya noHabitam Alemu wase-Ethiopia.
Akukho ukuqina ngomqondo okwedlula lokhu uma kukhona abantu abalwa nento enhle osuke uyenza. USemenya usekhombise kaningi ukuthi akafune kunaka abantu abakhuluma kabi ngaye kodwa into esemqondweni wakhe ukugijima nokwephula amarekhodi.
Kuyajabulisa ukuthi uSemenya akazitholi eyedwa kule mpi njengoba inhlangano eyengamele ezokugijima eNingizimu Afrika, i-Athletics South Africa (ASA), iveze ukuthi izoludlulisela kwiCourt of Arbitration for Sport udaba oluthinta ukuphoqwa kwabesifazane abane-testosterone ephezulu ukuthi basebenzise amaphilisi okuyehlisa.
Simncoma kakhulu uSemenya ngokubadelisa inkani enkundleni labo abanomona ngempumelelo yakhe kwezokusubatha. Akaqhubeke nokuphakamisela phezulu ifulegi laseNingizimu Afrika.