Kuningi esingakwenza ukuthuthukisa izitolo nezipaza
SIKHULA NGOMNOTHO
UCWANINGO lwango-2016 luqinisekisa ukuthi zingaphezulu kuka-100 000 izipaza nezitolo zasemalokishini nasemakhaya. Iningi lezipaza zisungulwa abantu abafuna ukuchibiyela imali engenayo nabasuke bengenawo umsebenzi befuna ukuqhuba impilo.
Yize befuna ukwenza inzuzo kodwa kuvame ukuthi kungabikho wuhlelo lokukhulisa ibhizinisi ukuze libe likhulu. Nasekwenzeni inzuzo inkulu ingcindezi ngoba izipaza zithengisa into efanayo futhi zisondelene kakhulu. Ngaphandle kwamasu okwenza inzuzo ethe xaxa nohlelo lokukhula abasunguli abaningi basenkingeni, bagcine sebeqashisa ngezitolo zabo. Yingakho iningi lazo ezweni lonke seziphethwe abokufika bakwamanye amazwe. Lesi simo sisho ukuthi siyehluleka ebhizinisini nasekwakheni umnotho. Umbuzo uthi ikuphi inkinga? Yini sihluleke ukuqhuba izitolo?
Ukuzama ukuwuphendula kungasisiza ukucabanga ngokuthi yini eyenza isitolo siphumelele. Ucwaningo lubeka izinto eziyisishigalombili ezibalulekile kumakhasimende.
Eqhulwini ubuningi bemikhiqizo eyahlukahlukene, ikhwalithi yemikhiqizo, intengo, ukuthokozela ukuthenga, izikhathi zokuvula, ukuba seduze, osayizi bemikhiqizo nokuthenga ngesikweletu.
Kulolu hla izipaza nezitolo zasemakhaya zenza kangcono kokuthathu kuphela; ukuba seduze, osayizi bemikhiqizo nokuthenga ngesikweletu.
Ubuningi bemikhiqizo eyahlukehlukene, izinga nentengo yemikhiqizo akuhambi kahle yize kuseqhulwini ezidingweni zabathengi.
Lolu hla alusiniki impendulo ephelele kepha lusisiza ukuthi sijule ukufuna imbangela yokuhluleka kwethu.
Okokuqala nje ukusungula isitolo kudinga imali, indawo ekulungele ukuthengisa nolwazi lokuhlangabezana nezidingo zamakhasimende.
Imali yingqinamba yokuqala, uma incane kusho ukuthi ngeke kube lula ukuqala ngemikhiqizo eyahlukene. Akuyona inkinga ukuqala ngemikhiqizo embalwa kodwa inkinga ukungakwazi ukwandisa imikhiqizo uma sekudingeka.
Inkinga yemali ibhebhethekiswa ukuthi sidinga ukuphila ngayo inzuzo sibe isitolo singakasimami ngokwanele.
Into engaba yinhle wukuthi singayithinti imali yesitolo okungenani izinyanga eziyisithupha uma sisakhula. Akuyona-ke into elula leyo ngoba siqala isitolo ngoba sifuna ukuphila ngaso. Okunye okuqhakanjiswa abaluleki bezamabhizinisi wukuhlukanisa imali yebhizinisi nemali yezidingo zakho ongumnikazi.
Lokhu singakwenza ngokuthi sibe nohlelo lokuhola ebhizinisini, singasebenzisi imali ngokuthanda nje. Siselapho kufanele silungiselele izimo ezingahleliwe ezingase zidinge imali.
Yingakho kufanele kube nemali esiyibekayo nomshwalense. Kusobala ukuthi kufanele sijule ngomcabango uma siqala noma sesiqhuba izitolo, sidinga ukuba nezindlela zokuphatha imali yebhizinisi.
Indawo ekulungele ukuthengisa ibalulekile ngoba isho ukuthi abantu abaningi bayakwazi ukufika kuyo kalula. Ziyabalwa-ke izindawo ezinjalo okwenza kube nzima ukuzithola ngoba sezithathiwe noma zibiza ngokweqile.
Lokhu kuphoqa ukuthi kube nenqwaba yezitolo ezisondelene ezithengisa into efanayo. Lokhu kusondelana nokuthengisa into eyodwa kusho ukwahlukaniselana ngamakhasimende nenzuzo ephansi.
Kubaluleke lapha-ke ukwehluka ngokwemikhiqizo, ikhwalithi, amanani nezikhathi zokuvula. Okusemqoka kakhulu ukuphatha kahle amakhasimende ukuze abuye futhi atshele namanye ngokuphatheka kahle esitolo sakho. Kwayisona isitolo sibukeke futhi sihlanzeke. Okunye ongakwenza ukuheha amakhasimende, ukuwanikeza ulwazi lwamahhala njengezinhlelo zikahulumeni noma amathuba emisebenzi. Ungaqala ngokuthi ube nebhodi lezaziso, ube namaphephandaba atholakala mahhala nokunye.
Kungasiza ukukopela ezinye izinto ezenziwa izitolo ezinkulu ezifana nokukhokhwa kwezikweletu, ukuthenga amathikithi nokunye. Umongo webhizinisi ukubeka amakhasimende phambili ngaso sonke isikhathi.Lokhu ukwenza ngokuthi azizwe ebalulekile esitolo sakho.
Kungabonakala kuwumqansa konke lokhu kodwa uma nje ungathola ulwazi ngalezi zindlela nokunye okwakwenza ukubeka isitolo sakho emqondweni wamakhasimende, usendleleni eya empumelelweni.
Ngaphezu kolwazi kungasiza ukuhlanganyela nabanye abanikazi bezitolo nakhe inkampani ezohlala emqondweni wabathengi. Lokhu kuhlangana kungasiza ukuthi nithenge i-stock ndawonye ngamanani aphansi, nibeke imali ndawonye, nibe nezipesheli ngaphandle kwezindleko ezinkulu.
Sithinte ku-031 829 5820 noma uthumele uWhatsApp/ sms ku-083 354 8794 ujoyine UbuntuWealth group uthole ulwazi. Hheshe!