UMasipala weTheku uzibophezele ekulweni nenkohlakalo
MHLELI: Impendulo ngencwadi esihloko esithi: Inkohlakalo kubaphenyi benkohlakalo ephume kwiSolezwe lango-Ephreli 30, 2018.
UMasipala weTheku uwathathela phezulu onke amacala okukhwabanisa nenkohlakalo. Sifisa ukunxusa umbhali ukuthi eze azobika zonke izinkinga zenkohlakalo ezenzeka oPhikweni lakwa-City Integrity and Investigations Unit ukuze kuphenywe.
Lokhu angakubika ngqo ehhovisi lemenenja kamasipala, noma ehambe eyobika kuMvikeli woMphakathi, ehhovisi lakwaCOGTA noma kunoma iyiphi inhlangano yezophenyo.
Uphiko lweCity Integrity and Investigations lulwa nenkohlakalo kodwa alukho ngaphezu komthetho futhi uma kukhona izinsolo kuzophenywa.
Idolobha lifisa ukukucacisa ukuthi bonke abasebenzi abaqashwe wuphiko lweCity Integrity and Investigations banazo zonke izimfanelo ezingaphansi kwe -Association for Certified Fraud Examiners. Ngokuba ngaphansi kwale nhlangano kusho ukuthi uzoyilandela yonke imigomo yokuphenya neyokulwa nokukhwabanisa nenkohlakalo.
Izinsolo zokuqasha izihlobo nezokuqasha abantu abangenazo iziqu zingamampunge futhi azinabo ubufakazi. Inhlololwazi iqhutshwa yithimba lezikhulu futhi kusuke kukhona nomsebenzi wophiko lakwaHuman Resources Unit.
Ukuqashwa kwabantu kuphasiswa yiNhloko yophiko, iNhloko yakwaHuman Resources nemenenja yedolobha. Ngakhoke kuningi okubhekwayo ukuze kuqinisekiswe ukuthi kuqashwe umuntu ngokungenzeleli futhi unazo zonke izimfanelo.
Ngifisa ukuphinde ngimnxuse umbhali wencwadi ukuthi alethe ubufakazi ukuze lolu daba kuzobhekwana nalo ngendlela efanele. Sipho Nzuza IMENENJA YEDOLOBHA