Badela amaholidi ukuze benze kahle eJG
UMA ucabanga ngesikole iJG Zuma High, into yokuqala efikayo emqondweni ngalesi sikole umculo omnandi wabafundi baso njengoba sinandisa nasemicimbini ehlukene kahulumeni.
Okunye okufikayo ngukuthi siqanjwe ngobenguMengameli wezwe uMnuz Jacob Zuma, naye oyigagu uma kuziwa emculweni njengoba ecula izingoma ezehlukene ezisuke zihambisana nesimo abhekene naso ngaleso sikhathi. Lesi sikole asidumile kuphela ngomculo njengoba nasezifundweni senza kahle. Singesinye sezikole esilele kunombolo 8, esifundeni iPinetown ezikoleni ezenza kahle minyaka yonke kwa-matric.
Nakuba sakhelwe yimijondolo njengoba sikwaBester, eNanda, futhi kufundwa mahhala kodwa sikleliswe nezikole ezenza kahle futhi ezibizayo ezifana neWestville Boys, Kloof High, Star College nezinye ezingaphansi kwalesi sifunda. Uma ubuza ikhambi lokwenza kahle, basho ngazwi linye bathi - ukuzikhandla, ukudela amaholidi, izimpelasonto nobumnandi.
Nyakenye sithole u-97% kwa-matric kanti sidlalela ko-90% asitholi ngaphansi kwalokhu.
Savulwa ngoJanuwari 3, abanye abafundi nothisha besasemaholidini. Njengoba abanye abafundi bebevalele amaholidi amade ngempelasonto emasontweni amabili, khona umsebenzi ubusha kungathi izikole azivaliwe.
Lesi sikole esiqanjwe ngoMsholozi ngo-2005, esayiPhini likaMengameli wezwe, sasungulwa ngesinye sezishoshovu zeSadtu, uMnuz Sipho “KK” Nkosi owayenguNobhala wale nyunyana yothisha oseyilungu lesiShayamthetho saKwaZuluNatal. UNkosi wayaziwa ngokuyiphaka impi yokulwa noMnyango wezeMfundo ngezinto ezithinta othisha kodwa egxile ekutheni isikole sakhe senze kahle njengoba u-matric wokuqala wakhona wathola u-100% ngo-2003.
Uthishanhloko waso uMnuz Thembokuhle “Sihle” Mthembu, walandwa nguyena uNkosi ezofundisa iBiology.
“Wayefuna abantu ababukhali kuphela yingakho ayephuma engena ezikoleni. Lesi sikole saqala siyise-Ekuthuleni sihlangene nesamabanga aphansi esisendaweni eyodwa naso. Sabe sesihlukaniswa ngo-2001 kwathi ngo-2003 kwaba no-matric wokuqala. U-100% besiwuthola nje yingakho kulo nyaka sifuna ukubuyela kuwona u-100%. Ngiqale ukubamba njengephini likathishanhloko ngo-2015 kwathi ngoDisemba nyakenye ngaqokwa ngokugcwele,” kusho uMthembu.
Uthe kungenwa ekuseni, abafundi bazifundele bese kuthi nantambama basale bafunde. “Sebefunda nasebusuku-ke manje lapho besuke bezifundela ngoba bafuna ukuzimela. Abanye babafundi asebefunda ezikhungweni zemfundo ephakeme nabo bayeza bazofaka isandla bafundise abafundi. Lokhu kuyasiza kakhulu ngoba abafundi bayakwazi ukusho lapho bengacoshi khona bathole usizo.”
Uthe ngezimpelasonto kunohlelo lokuthi bafunde ubusuku bonke benze izifundo iMaths, Maths Literacy nezinye.
“Akukho ukuphumula noma ukuya kozijabulisa ngoba ngoLwezihlanu kunalolu hlelo kuze kuse. Esikwenzayo sikwenzela abafundi bethu ukuze bakwazi ukubhekana nananoma imuphi umbuzo abawufica ephepheni,” kusho uMthembu.
Uthe abazali nomphakathi babambe elikhulu iqhaza ngoba ibona abavuma.
“Kwazivumela abazali ngoba ayikho into esiyenza ngaphandle kwabo. Bayafika kwabona bazobheka ukuthi kuyafundwa. Othisha ibona bantu abawusizo kakhulu ngoba bayavolontiya, bagade izingane ngezimpelasonto ekubeni ngabe baphumule,” kuqhuba uMthembu.
Uthe ukuzinikela kothisha yikhona okwenza bathole imiphumela emihle kanje wathi izinhlelo ezifuze lezi ziyabasiza abafundi abangakwazi ukufunda emakhaya ngoba indawo incane behlala emjondolo.
“Sinokusebenzisana okuhle, angikwazi ukukwenza ngingedwa ngoba ngiya emihlanganweni yomnyango. Ngishiya ozakwethu baqhubeke ngibuye ntambama ngizoqhubeka nomsebenzi. Impilo ayisekho, siphilela abafundi. Unkosikazi uze adlule nezingane uma esebuya ukuyozilanda esikoleni ngoba umuntu uphuma ebusuku angikwazi ukuhlala nazo,” kusho uMthembu.
Uthe bayawuqinisa nomthetho njengoba abafundi besayina ukuthi bebekhona uma kufundwa.
Lesi sikole sinabafundi abangu-1319, othisha abangu-48 senzisa izifundo eziningi okubalwa i-drama, ubuchwepheshe, izifundo zekhompyutha nezinye.
Nakuba senza kahle kanje kodwa sinenkinga yokugcwala kakhulu emakilasini.
Amanye amakilasi akwaGrade 8, anabafundi abevile ku-100 kuthisha oyedwa, amanye anabafundi abangu-80.
Ezikoleni ikakhulu okwakungezabamhlophe abafundi baba ngu-30 kuya ku-35 kuthisha ngamunye.
UMthembu uthe kugcwele kakhulu emakilasini wathi banawo namagumbi angomahamba nendlwana.
“Uhlelo lokudla luyasisiza kakhulu ngoba abafundi abalovi, beza njalo esikoleni ukuze bathole ukudla.”
UMthembu uthe uZuma wake wabavakashela esayiPhini likaMengameli ezobabheka ukuthi basayibambe ngakho wathi njengoba esathatha umhlalaphansi engasekho matasa banethemba lokuthi uzovela azobabona.
Uthe balungiselela umncintiswano womculo oqanjwe ngenjinga uPatrice Motsepe okule nyanga njengoba ngo-2016 baziqwaqwada zonke ezinye izikole zakuleli ngomculo.
Lokhu kufakazelwa yizindondo ezigcwele nasehhovisi lakhe zomculo.
“Njalo ekuseni siqala ngomthandazo, abafundi bayasibusisa ngengoma. Siqala usuku lwethu kamnandi.”