AbaseNkwali bakhala ngokuxoshwa emitholampilo
abasebenzi. Nyakenye umphakathi wakule ndawo wamasha ukhala ngokuthi abahlengikazi bakulo mtholampilo badalula ulwazi oluyimfihlo lweziguli, basebenza uma bethanda, ngoLwesihlanu abavuli emtholampilo, ezinye iziguli baziphindisela emuva bathi sebevalile sibe singakashayi sikhathi sokuthi bashayise.
Bathi umnyango wezempilo kulesi sifundazwe wabashintsha abahlengikazi okwakukhalwa ngabo kwalethwa abekweminye imitholampilo.
Umthombo waleli phephandaba osekomitini elixazulula izinkinga zalo mtholampilo, uthe: “Isu lomnyango lokushintsha abanye abahlengikazi alizange lisebenze.
Abahlengikazi ababengahambanga babephambanisa imishanguzo yeziguli ngamabomu, kwabonakala ukuthi kuzofa abantu, kungcono uvalwe okwesikhashana, kusabhekwa ukuthi kungenziwa njani ukuze kuxazululwe lolu daba,” kusho lo mthombo.
UNgqongqoshe woMnyango wezeMpilo kulesi sifundazwe, uDkt Sibongiseni Dhlomo, ngoJanuwari uke wavakashela kulo mtholampilo engalindelwe ngemuva kokuthi ebikelwe ukuthi abahlengikazi bashiya iziguli bejahe ukuyotitiliza endalini kaBlack Friday, nyakenye, ngalolo suku iziguli zaphindiselwa emakhaya.
Umthombo uthi ngemuva kokufika kukangqongqoshe kwabonakala ukuthi indlela eyayisetshenziswe yihhovisi lezempilo lesifunda ngeke isebenze.
“Kwabizwa umhlangano womphakathi sachazelwa ukuthi umtholampilo uzovalwa okwesikhashana, savuma. Okusiphatha kabi ukuthi uma siya kweminye imitholampilo abahlengikazi bayasithethisa, bathi savala umtholampilo wethu manje sizokwandisa umsebenzi kweminye imitholampilo. Sisizakala kule mitholampilo uma kube nomhlengikazi onesihe wasidabukela.
“Angazi ukuthi kwakumele sithule abasebenzi bakahulumeni bezenzela umathanda, singakhalazi? Asiwuvalanga thina umtholampilo sakhala ngokuziphatha kwabahlengikazi. Sicela uNgqongqoshe angenelele asitshele ukuthi senze njani,” kusho yena.
UNksz Ncumisa Mafunda okhulumela uMnyango wezeMpilo KwaZulu-Natal, uthe umnyango uyalwazi udaba lwalo mtholampilo futhi kuningi osukwenzile ukulungisa isimo.
“Umnyango uzomemezela maduze izihlelo zawo ngalo mtholampilo,” kusho yena.