Azoheha ngokwedlulele amabhishi esifundazweni iKwaZulu-Natal
AMABHISHI aKwaZulu-Natal azothuthukiswa ukuze ahehe izivakashi ezichitha amaholidi esifundazwe.
Lokhu kushiwo uNgqongqoshe wezokuThuthukiswa koMnotho, ezokuVakasha nezeMvelo esifundazweni, uMnuz Sihle Zikalala. Uveze ukuthi umnyango unendathane yezinhlelo zokuthuthukisa ezomnotho osuziqalile.
UZikalala ubekhuluma esidlweni sasekuseni esandulele ukuvulwa ngokusemthethweni kweTourism Indaba, esibizwa nge-Africa’s Travel Indaba, eqale izolo, ezophela kusasa
Uveze ukuthi iTinley Manor Beach Resort izolungiswa ngoR1.2 billion, iBlythedale Coast Resort izolungiswa ngoR350 million, iPoint Waterfront izolungiswa ngoR40 billion.
Uthe kuzolungiswa nomgwaqo uWarwick ngoR1.3 billion nesikhungo okwenziwa kuso izingqunguthela, iNkosi Albert Luthuli International Convention Centre.
Uqhube wathi bafuna ukuthi isifundazwe ikwaZulu-Natal kube yisona esihamba phambili ngokudonsa izivakashi e-Afrika.
“Lokhu sizokwenza ngokuthi sihehe izivakashi eziningi eziphuma ngaphandle kwaleli, sigqugquzele abantu bakuleli ukuthi bazijwayeze ukuvakasha ngaphakathi ezweni ngaphambi kokuthi bavakashele emazweni angaphandle.
Abantu bakulesi sifundazwe nabo sifuna ukuthi sibakhuthaze ukuthi kube yibona abasazi kangcono isifundazwe sabo ngokuvakasha ezikhungweni nasezindaweni zokungcebeleka ezikhona,” kusho uZikalala.
IPhini leMeya yeTheku uNkk Fawzia Peer lithe liyaziqhenya ngokuthi le ngqungquthela sekuphele iminyaka ewu-27 iba kuleli dolobha.
“ITheku ligabe ngokuba nezikhungo ezahlukene zokungcebeleka, ukwehlukana kwazo kuholela ekutheni abantu beze kuleli dolobha ngezizathu ezihlukene, akulona ulwandle kuphela,” kusho iPhini leMeya.
UZikalala ubuye wamemezela ukuthi kusukela ngo-Okthoba kuzobe sekunendiza yakwaBritish Airways ezosuka esikhumulweni sezindiza iKing Shaka iye eLondon ngqo.
“Ukuvulwa kwalo mzila sinethemba lokuthi kuzokwenza ukuthi kube lula ukuthi abantu bakulesi sifundazwe abangosomabhizinisi nabavakashela eLondon bangalokhu bexhuma, obekuchitha isikhathi esiningi,” kusho uZikalala.
UNkk Phindile Makwakwa oyisikhulu esibambile kwiTourism KwaZulu-Natal uthe kunezihambeli ezingu-7000 eziphuma emazweni angaphandle kwakuleli ezizobe ziyingxenye ye-Africa’s Tourism Indaba.