UManana ucabanga ukuvulela uWiro icala
ANGASE avulelwe icala lokuqola uNkk Christine Wiro obeqashwe yilungu le-ANC ePhalamende, uMnuz Mduduzi Manana, othe uhoxise icala emuva kokuthenjiswa uR100 000.
Lezi zindaba zivele esitatimendeni esithunyelwe nguManana kwabezindaba lapho ethe kunomkhankaso wokungcolisa igama lakhe ohlelwa ngabathile njengoba esevulelwe icala lokushaya eliphinde lahoxiswa obengumsebenzi wakhe wasendlini uNksz Wiro.
“Ngisaxoxisana nethimba lami lezomthetho ukuthi ngenze njani ngalolu daba kodwa ngicabanga ukuvula icala lokusatshiswa ukuthi ngikhiphe imali. Ngifuna ukucacisa ukuthi selokhu ngalahlwa yicala lokushaya ngonyaka odlule kunabathile abangcolisa igama lami. Angingabazi ukuthi yibona abahlohle uNksz Wiro ukuthi ayovula icala bamxhumanisa nezintatheli,” kusho uManana.
Ngokombiko weThe Times kuthiwa uManana nodadewabo bathembise uNksz Wiro uR100 000 nomunye umsebenzi uma esula icala.
Kodwa uManana uthi nguNkk Wiro nabomndeni wakhe akade befuna imali ngenkani.
Uthe emuva kwesigameko sangonyaka odlule esamlahlekisela ngomsebenzi wakhe wafunga ukuthi ngeke aphinde ashaye abantu.
UMnuz Sizwe Pamla okhulumela iCosatu kuzwelonke uthe, i-ANC kufanele ixoshe uManana ePhalamende nasekomitini elibhekelele ukusebenza kwenhlangano ngoba kuyacaca akazimisele ukulandela umthetho.
“Sithumele ithimba lethu kuNksz Wiro, lizomnika lonke usizo aludingayo noma ngabe ufuna abameli sizomnika. Sisolile ukuthi kukhona okwenzekile uma sizwa ukuthi ulisulile icala. Sithi akuphele ukuxhashazwa kwabasebenzi ikakhulukazi abasezindlini nabasemapulazini,” kusho uPamla.
Ugqugquzele abasebenzi ukuthi babikele iCosatu uma abaqashi bebasabisa noma bebahlukumeza ukuze bathole usizo abaludingayo.
UMnuz Bafana Khumalo weSonke Gender Justice, uthe nabo bafuna uManana ajeze ngoba ngeke umuntu avule icala bese elisula kungekho asatshiswe ngakho.
“UNksz Wiro uthe usatshiswe ngokuthi uzobuyiselwa kwelakubo eZimbabwe, kuyasihlukumeza lokhu ngoba kusho ukuthi usule icala ngoba esaba okuthile. Sifuna amaphoyisa aphenye lolu daba ne-ANC sifuna imphenye ngoba ubukeka enesandla esilula kwabesifazane,” kusho uKhumalo.
UNobhala we-ANC Women’s League uNkk Meokgo Matuba, uthe bayabeseka bonke abesifazane abahlukunyezwayo futhi balibonile icala elivuliwe laphinde lasulwa ebelibhekene noManana.
“Siyawulandela umthetho othi umuntu umsulwa aze alahlwe yicala enkantolo. Ukusulwa kwamacala okushaywa kwabesifazane kubuyisela emuva umzabalazo wokulwa nesihlava esibi sokuhlukunyezwa kwabo. Sigqugquzela bonke abavule amacala ukuthi babe nesibindi balinde umthetho ukuthi usebenze,” kusho uNkk Matuba.
UMnuz Molaodi Wa Sekake okhulumela iYoung Communist League uthe, siyabanyanyisa isenzo sikaManana osezakhele udumo ngokushaya abesifazane.
“Sifuna uManana azikhulumele ngalezi zinsolo acacise ukuthi umkhokhele noma cha umsebenzi wakhe wasendlini. Akwamukelekile ukuhlukunyezwa kwabesifazane, kuyanyanyisa, abenza lo mkhuba kufanele baboshwe. Sifuna asule esikhundleni uma kuwukuthi i-ANC izimisele ngokubuyisa isithunzi sayo nethemba lokuthi ayikubekezeleli ukuhlukunyezwa kwabesifazane,” kusho uWa Sekake.
UMengameli Cyril Ramaphosa uthe udaba lukaManana ebengakabikelwa lona kodwa ulubonile emaphephandabeni.
“UManana kufanele alandele imigomo yenhlangano yakhe (ANC) kwenziwe okwenzeka kwabanye abasuke bebhekene nezinsolo ezifuze lezi. Asikugqugquzeli ukuhlukunyezwa kwabesifazane nezingane futhi sizonikeza amaphoyisa izinsiza kusebenza ukuze ziqede lesi sihlava esibi,” kusho uRamaphosa.