Othisha baseNdumo bamashele emaphoyiseni
BAMASHELE esiteshini samaphoyisa eNdumo izolo othisha baseJozini, abakhala ngokungacaci kophenyo ngokunyamalala kukazakwabo ngoMashi.
Le mashi ebihlelwe ngothisha abangamalungu eSadtu, bekuhloswe ngayo ukufaka ingcindezi emaphoyiseni ngokulahleka kukaMnuz Xolani Mathenjwa. UMathenjwa obenguthisha Ekuhlehleni Primary eJozini, walahleka ngoMashi 15 eyohlangana nomngani.
Othisha bahambise incwadi yezikhalo kumphathi weziteshi zamaphoyisa eMkhanyakude, banqumela amaphoyisa izinsuku eziyisikhombisa ukuthi abanikezwe impendulo.
UNobhala weSadtu eNorth Coast Region, uMnuz Makhayandile Madikana uthe: “Asanelisekile ngendlela amaphoyisa alusingathe ngayo udaba lukaMathenjwa. Ayazi ngodaba lomngani wakhe kodwa awakaze alusukumele, enze nophenyo kahle. Akuyona into encane ukulahleka kukathisha kodwa kubonakala sengathi amaphoyisa awazimisele ukubambisana nathi,” kuchaza uMadikana.
Uthe le mashi ihambisana nekhwelo labo lokunxenxa uhulumeni ukuthi aqinisekile ukuphepha kothisha. Uthe ukunyamalala kukaMathenjwa kuwubufakazi bokuthi othisha abaphephile.
UNksz Zani Khoza oyingoduso kaMathenjwa, uthe bayahambisana nemashi ebihlelwe othisha. Uthe ubezimisele ukuba yingxenye yemashi kodwa wathathwa olunye uhambo oluphuthumayo.
“Besithembe ukuthi abomthetho yibona abazosiza kulolu daba kodwa asiboni sisizakala. Udaba sesiludlulisele kumphathi weziteshi eMkhanyakude, esihlangane naye nomndeni ngoLwesine olwedlule. Sibona sengathi sizosizakala emuva kwalo mhlangano ngoba umphathi uyasibikela ngokuqhubekayo.”
Mayelana nomngani osolwayo, uNksz Khoza uthe uyamazi kodwa akukuningi akwaziyo ngaye. Uthe wazi ukuthi bebehlanganiswe yimoto kaMathenjwa okwakumele ikhandwe umsolwa.
Uveze ukuthi akazi ukuthi babeyaphi ngosuku okwanyamalala ngalo uMathenjwa ngoba akatshelwanga lutho.
Kusolwa ukuthi uMathenjwa wayeyohlangana nomngani wakhe beya eMozambique ngosuku anyamalala ngalo. Kuthiwa wagcina eshayele ucingo umngani wakhe emini. Umngani oke waphonswa imibuzo ngamaphoyisa, kuthiwa wathi uMathenjwa wayethi uyaduka ngesikhathi emshayela ucingo.
Umsolwa useke watitinywa amalungu omphakathi walaliswa esibhedlela. Izikhalo zinikezwe iphini lomphathi weziteshi uCaptain Nyawo, elingatholakalanga igama lakhe. Okhulumela amaphoyisa KwaZuluNatal uCaptain Nqobile Gwala uthe uthisha akakatholakali.