Iphijama likhombisa ukuhleleka
KUKE kwanehlaya elisabalale ezinkundleni zokuxhumana lapho kuhlekiswa khona ngamadoda agqoka amaphijama uma elala. Kuleli hlaya bekuthiwa indoda elala ngamaphijama kuba sengathi yisiguli eseqe esibhedlela. Lokhu bekubekwa ngokuthi akubukeki uma owesilisa egqoke izimpahla zokulala, okuthathwa njengomkhuba wabesifazane noma wezingane.
Yize zikhona izimpahla zokulala ezinhlobonhlobo zabo bonke ubulili, kunomqondo wokuthi ngezabathize. Abanye bagqoka noma yini uma belala, okukhona nabakhetha ukulala ngesudi yesele.
Ucwaningo olwenziwe e-England ngonyaka odlule luveze ukuthi bangu40% abagqoka izimpahla zokulala, bangu-30% abalala ngezangaphansi bese abanye belala bengagqokile. Labo abalala bengagqokile bathi basuke befuna ukukhululeka ebusuku.
UMnuz Nkosi Mdlalose, uthe ubengenandaba nokulala ngamaphijama kodwa ngumkakhe omphoqelelayo. Uthe ubejwayele ukulala ngesikhindi sangaphansi kodwa umkakhe wamupha amaphijama ngosuku lokuzalwa.
“Ngicabanga ukuthi ubekhombisa ukuthi akathandi ngilale ngesikhindi sangaphansi. Kube nzima ukujwayela ukulala ngamaphijama kodwa sengize ngajwayela. Wangithengela ngisho i-gown engiyigqoka uma ngivuka, ngiphuma ekamelweni.”
UNksz Nokulunga Ngobese uthe ukulala ngezimpahla zokulala kukhombisa ukuhleleka, ikakhulukazi kwabesifazane.
Uthi yena ulala ngamaphijama ngoba ayamkhulula. Le ntokazi ithe ahlukene ngoba ebusika kudingeka afudumele bese ehlobo igqoka awusilika.
Endabeni eshicilelwe kwi-The List.Com ngaphansi kwesihloko esithi: “Okungamele ukugqoke embhedeni,” umbhali uveza ukuthi ebusuku kumele ugqoke izimpahla ezikukhululayo.
Ugcizelela ukuthi ezakhiwe ngokotini yizona ezilungele ukulala. Uveza nokuthi izimpahla zokulala zenziwe ngendwangu ehlukile ngamabomu ngoba kubalulekile ukukhululeka.
“Kwezingafanele ukugqokwa uma usulala ubala izimpahla zangaphansi, ezinezinkinobho nezibambana kakhulu emzimbeni.
Umsiki wengephu we-Afrolicious Designs, uNksz Mamsie Mkhwanazi, uthe akujwayelekile ukuthi bakhangise ngezimpahla zokulala. Yize bengakhangisi ngalezi zimpahla, uthe sebakopela kuzona ukuthunga ezokugqoka.
Ulinganise ngama-track suit alula anezimbali osekuswenkwa ngawo.
“UBonang noRihana ngabanye bosaziwayo asebeke babonakala ngaleyo ngqephu. Le ngqephu kuswenkwa ngayo, kugqokwe ngisho namaqhoks. Ngisho amanye amabhantshi okuswenka asethathelwe kuma-gown okuvuka nezicathulo zihlotshiswe ngoboya njengama-morning shoes,” echaza.
Uthe sekunezikibha zabesilisa ezibukeka njengezokulala, nazo ezisuselwe kumaphijama.