Zijwayeze izithelo nokuphuza kakhulu amanzi ukuze uphile kahle – ungoti
AKULULA ukushintsha indlela yokudla kodwa ungoti wezempilo uthi kubalulekile ukuze abantu baphile kahle.
UMnuz Patrick Holford ongungoti wezempilo uthe kunezinto abantu okumele bazijwayeze ukuze baphile kahle. Uthe ukuzibekela lezi zinto eziyisihlanu kuyisiqalo sokuthi ulandele nezinye izindlela ezinempilo. Nakhu athi abantu kumele bakujwayele:
Ukuphuza amanzi Okungenani umuntu kudingeka aphuze izingilazi ezine zamanzi ngosuku. Lokhu kwenza umehluko emzimbeni nasemqondweni. Ukuphuza amanzi kusiza ukukhuculula ukungcola emzimbeni nasegazini. Kuyasiza ukufaka ulamula, u-ginger emanzini ukulekelela ukukhuculula ukungcola nokuthi amanzi anambitheke.
Izithelo nemifino Ngosuku kumele zibe nhlanu izithelo ezahlukene, ikakhulukazi eziluhlaza okumele umuntu azidle. Ungazikhethela noma yisiphi esihambisana nawe.
Ukudla okunembewu Lezi zidlo zinezakhazamzimba eziningi futhi zinika amandla. Zenza umqondo usebenze kahle. Kulezi zidlo kubalwa ezinecalcium, magnesium, manganese, molybdenum, zinc ne-selenium. Ithanga nekhabe ngezinye zalezi zidlo ezinembewu ezidingeka emzimbeni.
Cruciferous Vegetables. Lena yimifino esiza isibindi nokuhlaza igazi. Kubalwa iBroccoli, iklabishi, i-kale ne-cauliflower. Akumele luphele usuku ungayidlanga le mifino.
Izidlo ezineSulphur
Lapha sibala u-anyanisi, ugarlic nezinye izidlo ezinesulphur ne-amino acids. Kubalulekile ukuthi kunoma ikuphi okudlayo uqobele esinye salezi zidlo okuthiwa zivikela nezifo emzimbeni.
Ukuzivocavoca Ukudla ngeke kusebenze kahle uma kungahambisani nokuzivocavoca. Ziningi izindlela zesimanje zokuzivocavoca njengoba sekukhona nama-video kwiinternet. Akusadingi uye ejimini kuphela kodwa ungazivocavoca noma ikuphi ngokugijima, ukuhamba noma ukubhukuda.