Ayipheli impi kaNcobo neSafa
KUBUKEKA sengathi iSouth African Football Association (Safa) ifuna ukumshaya ngekhadi elibomvu, engabe esazihlanganisa nonobhutshuzwayo lowo owayengunompempe ongabambi mshini kwiPremier Soccer League (PSL), u-Andile “Ace” Ncobo.
Lokhu kungemuva kokuthi iSafa ixwayise uNcobo ngokuthi izombizela phambi kwekomiti layo eliqondisa ubugwegwe, imsola ngokudicilela phansi isithunzi senhlangano.
Izolo uNcobo uthe ubengakayitholi incwadi embeka amacala. “Into engiyitholile wukusatshiswa okuvela esikhulwini esiphezulu singitshela ukuthi bahlela ukungibeka amacala futhi bafuna ngixoshwe. Ngemuva kwalokho kuqhamuke isitatimende esithunyelwe kwabezindaba esithi asahlanganiswa amacala engizobekwa wona. Ngisalindile ukuthola uhla lwamacala. Ngizobe sengiphawula uma sengilutholile,” kusho uNcobo.
Okhulumela iSafa, uDominic Chimhavi, uqinisekisile ukuthi bahlanganisa amacala azobekwa wona uNcobo, ongaphansi kwesifunda seSafa, Amathole, e-Eastern Cape.
UNcobo ube sematheni kusukela kwavela ukuthi ungomunye wabazobanga isikhundla sobumengameli beSafa noDanny Jordaan okunguyena oqhoqhobele izintambo njengamanje. UJordaan uthathe isikhundla sobumengameli ngemuva kokhetho lwango-2013. Ukhetho kwakumele lube ngoMashi 25 kodwa kwagcina kungenzekanga ngenxa yokuthi uNcobo wayelokhu eyiphela endlebeni esola iSafa ngokungalandeli imigomo yokhetho ngaphambi kokuthi lwenzeke.
Muva nje iSafa iphinde yaba nomhlangano lapho kuvunyelwane ngokuthi ukhetho lobuholi obusha seluzoba ngoMeyi 29. Kulowo mhlangano kwavela ukuthi uNcobo waxolisa ngokugxibha iSafa esidlangalaleni. Nokho yena wakhipha isitatimende ekubiza ngamampunge aphindiwe ukuthi waxolisa.
“Angisoze ngaxolisa ngokuba yimi. Ukuba yimina kuhlanganisa ukukhuluma nokuma kwengikholelwa kukho. Ngizoqhubeka nokuphawula uma ngibona lapho kwenzeka izinto ngendlela engafanele. Angikaze ngixolise, ngingasayiphathi ke eyokuxolisa kwiSafa njengenhlangano ngokuyidicilela phansi,” kusho uNcobo esitatimendeni ngesonto eledlule.
Kubukeka sengathi uNcobo usefana nenunu engafi kwiSafa njengoba uChimhavi ethe kade ayekhuzwa kodwa alaleli.
“Kumele abhekane nekomiti eliqondisa izigwegwe njengoba ubematasa ememeza kabi igama leSafa kwabezindaba nanoma yikuphi lapho ethanda khona. Uzobona ukuthi akudlalwa uma esebhekene namacala azobekwa wona,” kusho uChimhavi.
Ebuzwa uChimhavi ukuthi ngabe indaba iqalwe wukuthi uNcobo asole iSafa ngokungalandeli imigomo yokhetho, uthe: “Kuningi nje akwenzile. Kade wayexwayiswa kodwa akalaleli. Sekuyisikhathi manje sokuthi abebhekane namacala akhe. Ukhulume kabi ngobuholi nangebhola. Isikhathi sokuthi umthetho usebenze.”
Akacacisanga ukuthi luzoqedwa nini uhla lwamacala “kodwa khona kuzokwenzeka noma ngabe kuthatha isikhathi esingakanani”.