UNtuli ufuna ukushiya kwiSundowns
UFUNA ukushiya kwiMamelodi Sundowns umdlali osekhathele wukuthi kubolekiswe ngaye, uBongi “KG” Ntuli, okwiPlatinum Stars.
UNtuli ujoyine iSundowns kumasizini amane edlule esuka kwiLamontville Golden Arrows eyayikade igawulwe yizembe kwiAbsa Premiership.
Udlale eqenjini lasePitoli izinyanga eziyisithupha ngemuva kwalokho wabolekiswa kuMaZulu. Ngesizini elandelayo ubolekiswe kwiDikwena.
Imenenja yakhe, uMike Mthembu, ithe uNtuli akasathandi ukudlala kwiSundowns.
“Ngicabanga ukuthi kusobala ukuthi uNtuli akekho ezinhlelweni zeSundowns ngoba sekuphele isikhathi eside ebolekiswa. Ngakho asikho isidingo sokuthi elokhu ebolekiswa ebe engekho ezinhlelweni zeqembu. Sibona kuyisu elihle ukuthi akhululwe azitholele elinye ikhaya kwenye indawo,” kusho uMthembu.
IDikwena isigawulwe yizembe kwi-Absa Premiership ngokwezibalo.
“Akhona amaqembu amfunayo uNtuli. Okwamanje angikho esimeni sokuwasho ngamagama kodwa ngeke abe nayo inkinga uma iSundowns ithatha isinqumo sokumdedela. Sizohlala phansi naye sibone ukuthi sivumelana ngani. Sizocela ukuthi adedelwe,” kusho uMthembu.
KwiSundowns ayikho indawo kaNtuli. Abafana Ba Style basebenzisa uPercy Tau noSibusiso Vilakazi phambili. Kusenzima ngisho nakuJeremy Brockie, osanda kusayina, ukuthola isikimu.
Ngaphandle kukaBrockie kunoCuthbert Malajila ohlale isikhathi eside elimele nomfana omncane uKeletso Makgwala.
“Njengamanje uNtuli ugxile ekutheni aqedele umdlalo wokugcina kwiPlatinum Stars bese sihlela ukuthi sizohlangana nini neSundowns ukuzobhunga ngekusasa lakhe,” kusho uMthembu.
Amaqembu amaningi achazwa yijubane, ukuzinikela nokudlubulundela kukaNtuli. AmaZulu ake amfuna isikhathi eside kodwa agcina engamtholanga.