UBudler uqophe umlando ngeleThe Ring Magazine
KUFEZEKE iphupho kumshayisibhakela waseNingizimu Afrika, uHekkie “Hexecutioner” Budler, ewina amabhande amathathu phambi kwabalandeli bembangi phesheya kwezilwandle.
UBudler uwine ibhande le-International Boxing Federation (IBF) junior flyweight, World Boxing Association (WBA) nele-The Rig Magazine ehlula ngamaphuzu uRyoichi Taguchi waseJapan empini ebikade ise-Ota City General Gymnasium izolo ekuseni.
Amajaji womathathu avumelene ngokuthi uBudler uyena okufanele ashaye amaphiko esigabeni se-junior flyweight, ahlulela impi ngo 114-113. UBudler, owayephethe ibhande le-International Boxing Organisation (IBO) ne-WBA strawweight, uqophe umlando ngokuba wumshayisibhakela wokuqala ukulwa impi okubangwa kuyona amabhande amathathu. Uthole leli thuba emuva kokuthi abaphathi bakhe befake isimangalo enhlanganweni i-IBF ngendlela engagculisi ahlulwe ngayo nguMilan Melindo wasePhilippines bebanga ibhande layo nyakenye.
I-IBF inqume ukuthi impi ibuyele eringini. Nokho ibhande likaMelindo beselithathwe nguTaguchi. Lokho kuholele ekuthini uBudler anikwe ithuba lokubhekana noTaguchi. UTaguchi ubevikela ibande le-WBA super okwesishiyagalombili. Ubeqala ukuvikela ele-IBF.
UBudler ubekade eshilo ukuthi kuyiphupho lakhe ukuthola ibhande le-The Ring Magazine elifunwa abashayisibhakela emhlabeni wonke. Ungumshayisibhakela wokuqala eNingizimu Afrika ukuliwina.
Empini yayizolo uBudler usebenze zibekwa eqoqa amaphuzu. Nakuba uTaguchi ezamile ukubuya emizuliswaneni eyisithupha yokugcina kodwa besikade sesihambile isikhathi. Ngomzuliswano ka-12 uBudler uvuke phansi kodwa lokho akuwenzanga umehluko kwazise ubekade eseqongelele amaphuzu anele ukuwina impi. UBudler unyusele irekhodi lakhe ku 32-3-0 kwathi elikaTaguchi lehlela ku 27-3-2. Kulindeleke ukuthi uBudler amukelwe njengenkosi eMzansi. Ufulathele leli efiselwe okuhle kodwa yinhlangano yesibhakela kuleli, iBoxing South Africa, into engajwayelekile.