Akayixoxi namuntu eyomqeqeshi weMpofana
UYIMUNYUNGA buthule indaba yomqeqeshi omusha usihlalo weKaizer Chiefs, uKaizer Motaung, okuthiwa uthathe isinqumo sokuzingela yedwa kulokhu.
IChiefs ayikamqashi omunye umqeqeshi kusukela kusule uSteve “Mphathi” Komphela ophoqwe yizibhelu ezisuswe abalandeli emuva kowandulela owamanqamu weNedbank Cup eMoses Mabhida Stadium emasontweni edlule.
Isizini ka-2017/2018 iphele sekuhlezi ebhentshini uPatrick Mabedi obekade eyiphini likaKomphela. Baningi abaqeqeshi asebemataniswe nomsebenzi wokuqeqesha iChiefs okukhona kubona owayepheka iChelsea neqembu lesizwe laseGhana, u-Avram Grant noNikola Kavazovic ofake iTownship Rollers kowamaqoqo weCaf Champions League okokuqala emlandweni wayo. Omunye obemataniswa neChiefs nguLuc Eymael owine iNedbank Cup neFree State Stars.
Umthombo ongaphakathi kwiChiefs uthe kulokhu uMotaung akayixoxi namuntu eyomqeqeshi. Kunezinsolo zokuthi ufuna umqeqeshi waphesheya kwezilwandle emuva kokuphoxwa nguKomphela obengumqeqeshi wokuqala waseMzansi amnikeze ithuba lokupheka Amakhosi ngokugcwele. Eminyakeni edlule uMotaung ugxekiwe ngesikhathi ethi iChiefs ayikakulungeli ukuqeqeshwa ngumqeqeshi maseMzansi.
“Kulokhu akatsheli muntu ukuthi umbheka kuphi umqeqeshi nokuthi obani akhuluma nabo. Indaba yomqeqeshi iyisifuba sakhe kulokhu. Abadlali bavalile kodwa thina siyasebenza kuze kube kumenyezelwa indaba yomqeqeshi,” kusho umthombo.
Amakhosi kulindeleke ukuthi amemezele nezinguquko zangaphakathi eqenjini kwazise kunabadlali abazokhonjwa indlela okukhona kubona izinkontileka zabo ezingeke zivuselelwe. Ngaphandle kwalokho kubhekwe ikusasa likaRob Hutting ofike kwiChiefs maphakathi nesizini kwathiwa uzoba ngumeluleki kaKomphela.
Okhulumela iChiefs, uVina Maphosa uthe indaba yomqeqeshi kungenzeka imenyezelwe phakathi noJuni wakuqinisekisa ukuthi bona abavalile kuze kube kumenyezelwa indaba yomqeqeshi nezinguquko ezizoba khona ePhefeni.