Kudutshulwe iphoyisa elithinteka ecaleni
BEKULINDELEKE ukuba libuyele enkantolo maduze ukuze kuqale ukuthethwa kwecala elithinteka kulo lokulunyiswa kwabantu ngezinja iphoyisa elidutshulwe ngoyaba lwezinhlamvu lingena emzini walo.
UConstable Musawenkosi Khwela ubephuma emsebenzini ngoLwesihlanu ngo-10 ebusuku ngesikhathi ehlaselwa ngabantu abangaziwa emzini wakhe eZwelibomvu ngaKwaNdengezi, bamdubula, walimala kanzima. Ulaliswe egunjini labagula kakhulu esibhedlela.
Isolezwe lithole ukuthi kwenzeka lokhu nje leli iphoyisa elisebenza ophikweni lwezinja eShongweni belilungiselela ukuba lona nozakwabo ababili, abanecala lokushaya ngenhloso yokulimaza nelokukhwabanisa, babuyele enkantolo ngenyanga ezayo ukuze kuqulwe icala labo.
UKhwela uphume ngebheyili ngo-Ephreli nonyaka emuva kokuba bedlulise isicelo sokunikezwa ibheyili enkantolo enkulu eThekwini, ababenqatshelwe yona yiNkantolo yeMantshi ePinetown.
Yisicelo sikaKhwela kuphela esaphumelela. Uhlaselwa nje bese ebuyele nasemsebenzini.
Basolwa ngokuthi bebefuna imali ebantwini, uma bengenayo babalumise ngezinja. Akukacaci ukuthi ukuhlaselwa kukaKhwela kumayelana nani.
NgoMgqibelo ibamba loMkhuzi wamaPhoyisa KwaZulu-Natal, uLieutenant General Nhlanhla Mkhwanazi, likugxekile ukuhlaselwa kukaKhwela.
“Abahlasela amaphoyisa bazobhekana nolaka lomthetho. Sifisela u-constable olimele ukuba alulame ngokushesha,” kusho uMkhwanazi.
Imizamo yokuthola umndeni wephoyisa ayiphumelelanga izolo njengoba abaphathi bamaphoyisa beveze ukuthi ucele ukuba izinombolo zawo zinganikezwa abezindaba ngoba awufisi ukuxoxisana nabo ngokwenzekile.