Imeya yeTheku igxeka ama-slay queen
IMEYA yoMkhandlu weTheku uNkk Zandile Gumede ikhwele yadilika kubantu besifazane ababizwa ngamaslay queen yathi kumele bazimele bayeke ukuthembela emadodeni.
Ikhuluma emcimbini wentsha ePeople’s Park eThekwini izolo, uNkk Gumede uthe ukuba yi-slay queen akusizi kodwa kuletha izinkinga.
“Sithi phansi ngama-slay queen nama-blessers, sifuna abantu besifazane abazofunda ukuze bazimele,” kusho uNkk Gumede.
Uthe ama-slay queen awanandaba nokuzakhela ikusasa kodwa afuna amadoda azowayisa eDubai.
Ama-slay queen kuthiwa abantu besifazane abathanda ukuphila impilo ephezulu kodwa abangenayo imali, bathembela kubantu besilisa ababizwa ngama-blesser ukuthi abenzele izinto.
UNkk Gumede uphinde wakhuza intsha wathi kumele ihlukane nezidakamizwa. “Utshwala nezidakamizwa buyazakhela amakhehla nezalukazi, hlukanani notshwala,” kusho uNkk Gumede.
NoNgqongqoshe wezokuThuthukiswa koMnotho esifundazweni uMnuz Sihle Zikalala ukhwele wadilika kuma-blesser wathi abulala ikusasa lezingane.
Uthe ama-blesser angamagwala ngoba asaba ontanga yabo.
“Abantu besilisa abangamablesser basuke bengazange basijabulele isikhathi sabo besayintsha yingakho kuthi sebebadala babuye benze izinto zobungane,” kusho uZikalala.
Unxuse intsha wathi kumele ibe sekhaleni emkhankasweni wokuguqula izisekelo zezomnotho.