Zikhuza ngemashi ezaseDUT
ZIHLOSE ukuxwayisa amadoda ngokubulala abantu besifazane, izitshudeni zaseDurban University of Technology (DUT), ngemashi yazo ezoba ngenyanga ezayo.
Lezi zitshudeni zisungule i#10ThousandManMarch okuyimashi enokuthula ukuze zilwe nesihlava sokubulawa kwabantu besifazane ngemuva kokubona zanda izigameko zokubulawa kwabantu besifazane, bebulawa ngabantu abathandana nabo noma ababethandana nabo.
Ngokusho kwabasunguli bale mashi, oPhilani Nzuza noQiniso Nzuza, kulindeleke abantu abangu-1 000 abazobe befake izikibha ezimnyama ezinombhalo oluhlaza.
Le mashi igqugquzela ukuthi amadoda asethe ukukhula abe yisibonelo esihle kubafana abasakhula ukuze abafundise ukuthanda nokuhlonipha abantu besifazane.
Ngale mashi bathi bahlose ukuthi bakhuze lo mkhuba kumadoda. Lezi zitshudeni zithi zizofundisa amadoda ngokuphatha abantu besifazane ngendlela elungile nokubafundisa ngamalungelo abantu.
UPhilani (26) ongumgqugquzeli wale mashi ezoba ngoJulayi 8, eBotha’s Garden uthe wacabanga ukusungula le mashi ngemuva kokukubona ukuthi abantu besilisa bahlezi begxekwa ezinkundleni zokuxhumana ngezinto ezimbi abazenzayo kodwa singekho isisombululo sokuthi lezi zinto zinganqandwa kanjani.
“Kubalulekile ukuthi amadoda avikele abantu besimame. Sesibone kaningi ezinkundleni zokuxhumana indlela amadoda abulala ngayo ngesihluku abantu besimame abafana noKarabo Mokoena, Zolile Khumalo, Nokuthula Thashe, noNtombizodwa Dlamini. Ngale mashi sifisa ukushiya abantu besilisa nomyalezo wokuthi bayeke ukubulala abantu besimame, babathande babavikele.” kuchaza uPhilani
UQiniso (24) oyiphini likamgqugquzeli wale mashi uthe imashi izobe inokuthula, igxile ekuxwayiseni amadoda ngokubulala abantu besifazane.
“Sibone ukuthi sesifikile isikhathi sokuthi njengentsha engabantu besilisa sihlangane simashe ngokuthula ukuze silwe nalesi sihluku sokubalawa komama bethu nodadewethu.” kusho uPhilani.
Imashi kulindeleke ukuthi iphelele eCity Hall lapho bezothula khona izikhalo zabo.