I-Natu iphenya izinsolo zocansi
INYUNYANA yothisha iNational Teachers Union (Natu) isiqale uphenyo ngezinsolo zocansi phakathi kwabafundi nothisha base-Adams College.
IPhini likaMengameli wale nyunyana uMnuz Allen Thompson lithe le nyunyana ithumele ubuholi bale nyunyana besifunda saseThekwini ukuthi buphenye ngalezi zinsolo.
Ngesonto eledlule uMnyango wezeMfundo KwaZuluNatal nawo ujube ithimba elizophenya ngalezi zinsolo, ezisabalele kwabezindaba nasezinkundleni zokuxhumana, ukuze kutholakale ubuqiniso bazo.
UThompson uthe bathumele ithimba labo elizophenya lithole ukuthi ngabe lezi zinsolo zikhona yini futhi zijule kangakanani.
“Sekuke kwenzeke phambilini kwaqubuka imibiko enjengale yasabalala ezinkundleni zokuxhumana kodwa kutholakale ukuthi alikho icala elivulwe wumfundi noma umzali womfundi. Kwesinye isikhathi icala livulwe ngomunye umuntu oseceleni athi uthisha othile uhlukumeza umfundi othile ngocansi kodwa abathintekayo bangasho lutho ngalo. Kwesinye isikhathi kuphume kwabezindaba ukuthi kunalezi zinsolo emuva kwalokho kuthuleke, lapho sisuke singazi noma bezingekho noma kuthuleke ngoba umgilwa esatshisiwe,” kusho uThompson.
Uqhube wathi kwesinye isikhathi kuyenzeka ukuthi lezi zinsolo zisuswa ngothisha abaxabene ngenhloso yokungcolisa igama lalowo thisha.
“Leli thimba lethu silindele ukuthi kusasa (ngoLwesibili), lisethulele umbiko ochazayo ukuthi lezi zinsolo ziphumaphi, futhi zijule kangakanani. Uma sesikutholile lokho sizobe sesibikela nomkhandlu wothisha, iSouth African Council for Educators (SACE), ukuze ungenelele,” kusho yena.