Kumiswe enye ingqungquthela ye-ANC
INKANTOLO isiphinde yamisa enye ingqungquthela yokukhetha ubuholi obusha be-ANC eMoses Mabhida okuholele ekutheni i-ANCYL inxuse ukuthi kuqalwe phansi izingxoxo zokubuyisana.
Kuthiwa izithunywa zamalungu e-ANC eMoses Mabhida ezihambisana nobengumengameli, uMnuz Jacob Zuma, besezibuthene enkundleni yezemidlalo eHarry Gwala ngoLwesihlanu zilindele ukuthi ingqungquthela iqale.
Uhlangothi oluhambisana noMengameli Cyril Ramaphosa kuthiwe luzwile ukuthi kuzoba nengqungquthela labe selifaka isicelo sokuyimisa enkantolo.
Ubuholi osebuphelelwe yisikhathi eMabhida kuthiwa buye enkantolo ngeledlule buyofuna imvume yokuthi kube nengqungquthela, inkantolo yabagunyaza ukuthi abaqhubeke nayo. Inkantolo ibuye yasiguqula isinqumo sayo sekufike amanye amalungu enhlangano abethi ayime ingqungquthela.
Lokhu okwenzeke eMabhida kuyafana nalokho okwenzeke engqungqutheleni yesifundazwe ngesikhathi imiswa ngomzuzu wokugcina ngamalungu anganeme aseMabhida, Lower South Coast naseHarry Gwala.
Ukulalelwa kwezethulo mayelana nokuhlehliswa kwengqungquthela kuzolalelwa ngoJulayi 7.
UNobhala we-ANCYL eMoses Mabhida, uMnuz Thembinkosi Zondi, uthe iyakhathaza indaba yokusebenzisa izinkantolo kwamalungu enhlangano.
“Kumanje ngididekile ngokuthi kumele kwenziweni ukuze kuqedwe izimpi ezisezinkantolo kodwa ngibona kumele kuqalwe izingxoxo zangempela zokubuyisana,” kusho uZondi.
UZondi uthe uhlangothi lwakhe seluke lwazama ukuhlangana namaqabane anganeme.
“Kodwa lawa maqabane akhuluma ngezinto ezididayo njengokuthi akhishwa ohlwini lokuba amakhansela ngo-2016, nokuthi akhishwa ngaphandle uma kunamathuba emisebenzi. Okunye akushoyo wukuthi afuna ukumeleleka ohlakeni oluhola isifunda,” kusho uZondi. Uthe ibikhona imizamo yokuthi ingqungquthela yesifunda sabo iqhutshwe phezu komyalelo wenkantolo kodwa uMxhumanisi we-ANC esifundazweni, uMnuz Sihle Zikalala, wathi ayime.
Okhulumela amalungu enhlangano anganeme, uNksz Zandle Sithole, uthe baphoqekile ukuthi bayimise ingqungquthela ngoba ubuholi besifundazwe nobesifunda buhlulekile ukulandela umyalelo kaNobhala-jikelele, uMnuz Ace Magashule, owawuthi akuxazululwe zonke izikhalo ngaphambi kokuthi kube izingqungquthela.
Kwi-video esabalele ezinkundleni zokuxhumana kubonakala izithunywa zaseMabhida zifuna uZikalala akhulume nazo engqungqutheleni.
UZikalala unqabile ukukhuluma ngalolu daba izolo.
“Ingqungquthela yesifunda saseMabhida ayizange ibe khona kodwa angizimisele ukukhuluma ngalolu daba nawe, ngicela ungihloniphe,” kusho uZikalala.