UMakhura uncome ezingenzi nzuzo
UNDUNANKULU waseGauteng, uMnuz David Makhura uvumile ukuthi yizinhlangano zomphakathi ezasukumisa i-ANC ukuthi iphenye ngokusetshenziswa koMbuso yidlanzana elifuna ukufeza izinhloso zalo.
UMakhura ubengomunye wezikhulumi engqugqutheleni i-Inclusive Growth kalowo owayengumengameli wezwe, uMnuz Kgalema Motlanthe ebiseziNtabeni zoKhahlamba KwaZuluNatal.
Phakathi kwezinto ezidingidiwe kubalwa ukusetshenziswa koMbuso yidlanzana, udaba lokubuyiswa komhlaba, uhulumeni wezwe nesimo somnotho.
Izolo, uMakhura uncome izinhlangano ezisebenzela umphakathi ngeqhaza lazo ekulweni nokusetshenziswa koMbuso yidlanzana nokuthi ziqinisekise ukuthi ayisetshenziswa ngendlela engafanele imali esikhwameni sezwe.
“Sifunde ukuthi ukube bezingekho izinhlangano ezisebenzela umphakathi ngabe asiphumanga kulesiya simo ebesikuso. Kwesinye isikhathi sigxila kwipolitiki size sizitshele ukuthi iyona ezolungisa izinkinga zethu,” kusho uMakhura.
Uphinde wancoma izinhlangano zomphakathi ngokufaka ingcindezi kuhulumeni waseGauteng ngodaba lokufa kweziguli ezasuswa eLife Esidimeni.
“Uma singayeki ukugxekwa izinhlangano zomphakathi ezinye izinkinga ngeke ziphele engingabala kuzo eyaseSidimeni. Kufanele sisebenzisane nazo ngoba ziyasiza,” kusho uMakhura.
Imindeni eyashonelwa ngamalungu ayo ngenxa yenkinga yaseSidimeni anxeshezelwa ngoR1.2 million, umndeni ngamunye.
Ngikulindele ukuthi abantu babe nokungabaza ukuthi zizojika izinto,” kusho uMakhura.
Uthe izikhathi ezinzima azikakadluli ngoba kusadingeka ukuthi kukhucululwe imfucuza kuhulumeni nakumabhizinisi ukuze kugwemeke isimo sangonyaka odlule.
“Ngesonto elidlule siyekile ukusebenzisana neMcKinsey neKPMG siwuhulumeni waseGauteng kanti nenkampani yezobuchwepheshe iSAP siyinike isexwayiso,” kusho uMakhura.