Ukunqanyulwa kukagesi kubuyile
LUQALE phansi uhlelo lokunqanyulwa kukagesi eNingizimu Afrika emuva kwesiteleka sabasebenzi baseEskom abafuna ukunyuselwa amaholo ngo-15%.
Abakwa-Eskom bathe ugesi uzonqamuka ihora elilodwa ezindaweni ezehlukene eNingizimu Afrika ngenxa yokuthi awukho ugesi onele enqolobaneni yabo.
Esitatimendeni i-Eskom ithe kuzothatha izinsuku eziwu-10 ukuthi ukusatshalaliswa kukagesi kubuyele esimeni esijwayelekile. Okwamanje ugesi uzonqanyulwa ngokwesigaba sokuqala, okusho ukuthi uzongabikhona ihora elilodwa.
Baqale ukuwunqamula ngoLwesine emuva kokuthi abasebenzi betelekele amaholo. Ubukade unqanyulwa ngokwesigaba sokuqala kodwa ngoMgqibelo unqanyulwe ngokwesigaba sesibili okusho ukuthi bekuphela amahora amabili abantu besebumnyameni.
UMnuz Mandla Nsele, iNhloko yezokuXhumana esabambile kuMasipala weTheku, uthe uMasipala utshelwe ngoLwesihlanu ngo-12 emini ukuthi ugesi uzocinywa wu-Eskom.
“Sicela abantu bangene kwiwebsite kaMasipala weTheku ethi www.durban.gov.za ukuze bathole ukuthi ugesi uzocima nini ezindaweni abahlala kuzo. U-Eskom uzoqhubeka nokwazisa umphakathi ngezinhlelo zokucima ugesi,” kusho uNsele.
UNkk Phakamile Majola, weNational Union of Metal Workers of South Africa (Numsa), uthe abasebenzi bazobuyela ezingxoxweni nomqashi emuva kokuhlangana noNgqongqoshe wamaBhizinisi kaHulumeni, uMnuz Pravin Gordhan, othe uzoqinisekisa ukuthi umqashi akabeki etafuleni u-0%.
“Phambilini umqashi usitshele ukuthi akanayo imali yokunyusa amaholo. Abasebenzi abangamalungu ezinyunyana iNumsa, National Union of Mineworkers neSolidarity bathe bafuna ukunyuselwa amaholo ngo-15% kodwa umqashi wathi uno-0% okusho ukuthi akanamali. Abasebenzi abakwamukelanga lokhu ngoba impilo iyabiza – kunyuke iVAT, uphethroli nokunye ngakho namaholo kufanele anyuswe.
Izingxoxo zizoqhubeka kuleli sonto futhi abasebenzi bazobe besebenza,” kusho uNkk Majola.