UZikalala ukhuze ubuqembuqembu kuKhongolose
KUKHUZWE izifunda ze-ANC KwaZulu-Natal ukuba ziqaphele ubungozi bokulahlekelwa amandla ngokhetho lwango-2019 uma zilibala ukubeka phambili izingqungquthela zokukhetha ubuholi nokulwa.
Lokhu kuvele ngesikhathi uMdidiyeli wohlaka lwesikhashana lwe-ANC KwaZulu-Natal,uMnuz Sihle Zikalala ekhuluma namalungu esiFunda iMalahleni esiseNewcastle, embuthanweni obusehholo laseMadadeni ngempelasonto.
“Ngaphambi kokuba sinake izingqungquthela, okubalulekile ukuthi sikulo mbutho ngenhloso yokuzosebenzela abantu bakithi. Yilokhu okumele kuhambe phambili. Ngakho indaba yokulwa neyokugqamisa izingqungquthela akusiyo into okufanele siyibeke eqhulwini ngoba lokho kuzoba nomthelela ongemuhle enhlanganweni njengoba sibheke okhethweni lukazwelonke lwangonyaka ozayo. Empeleni yilo okufanele silubeke phambili, siqale manje ukuzilungiselela sikhohlwe nje indaba yezingqungquthela. Ngikusho lokhu ngoba uma sigcina silibala izingqungquthela lokho kuyoba nobungozi bokuthi silahlekelwe amandla okuhola uhulumeni bese kusokola abantu bakithi esibasebenzelayo. Sithi ayime nje impela indaba yezingungquthela neyokuthi kuwine bani kwaphinde kwehlulwa bani, asibhekane no-2019,” kusho uZikalala.
Ukusho lokhu nje isifunda, iMalahleni singezinye ebezikhungethwe yizinkinga zokungaboni ngasolinye nemibango yezikhundla zobukhansela. Lesi simo sigcine sidala ukuthi kufike ukhetho luka-2016 sekuhlakazwe sonke isigungu esasiholwa uMnuz Arthur Zwane.
UZikalala ukugcizelele ukuthi u-2018 owokuqinisa ubumbano ku-ANC nokuhambisana nezimiso zikaNkk Albertina Sisulu benoDkt Nelson Mandela abebezobe behlanganisa iminyaka engu-100 kulo nyaka bazalwa.
UZikalala uthe osekubajabulisa ukuthi lesi sifunda sesikwazile ukuhlalisa ingungquthela yokukhetha ubuholi ngempumelelo.
IMalahleni iyisifunda se-ANC esingezinye ezinkulu kule nhlangano KwaZulu-Natal kanti sihlanganisa Amajuba, Dannhauser, Newcastle ne-Utrecht ebuye ibizwe ngokuthi kuseMadlangeni.