Osopolitiki badube umgubho wentsha befuna ukukhuluma
AMAQEMBU aphikisayo KwaZuluNatal ngaphandle kweDA adube umcimbi wokugubha uSuku lweNtsha oLundi ngoMgqibelo ngoba ekhala ngokunganikwa ithuba lokukhuluma.
I-NFP, IFP ne-EFF badube bahamba bangayilalela inkulumo kaNdunankulu wesifundazwe uMnuz Willies Mchunu.
Lawa maqembu akhala ngokuthi uhulumeni wesifundazwe oholwa yi-ANC okuyiwo obuhlela lo mcimbi awuzange ubanike ithuba lokukhuluma.
UMnuz Sabelo Sigugu omele intsha yeNFP esiShayamthetho saKwaZulu-Natal uthe sibaphathe kabi isenzo sikaMqondisi wohlelo, uDkt Sibongiseni Dhlomo onguNgqongqoshe wezeMpilo esifundazweni sokutshela abantu ukuthi abekho emcimbini ekubeni bekhona.
“Ngiyile ngayomtshela uDhlomo ukuthi sikhona kodwa wangangilalela nokuyilapho sibone khona ukuthi kumele sihambe,” kusho uSigudu.
Uthe i-ANC ibivele ihlelile ukuthi ibakhiphe inyumbazane ngokubalalisa oPhongolo kude nasoLundi lapho bekunomcimbi khona.
USigudu uthe ngeke baphinde bazihlanganise nalo mgubho ngoba babukelwa phansi.
“Kade vele sawuduba lo mcimbi kusukela ngo2015, bese singayi kuwona kusukela amalungu e-ANCYL ashaya amalungu amaqembu aphikisayo ngezitulo emcimbini owawuseMgungundlovu,” kusho uSigudu.
Uthe ngeke baze balahlekelwe yilutho ngokungawuhambeli lo mcimbi ngoba vele awuyisizi ngalutho intsha.
Okhulumela ihhovisi likaMchunu, uMnuz Thami Ngidi uthe angakuqinisekisa ukuthi wonke amaqembu aphikisayo abekhona ohlelweni.
Uthe isizathu esidale ukuthi iNFP, IFP ne-EFF bangakhulumi ukuthi bafike sekwedlule isikhathi emcimbini.
“Bafike sekukhuluma uNdunankulu, ngokosiko uma sekukhuluma umuntu othula inkulumo yosuku akube kusakhuluma muntu emva kwakhe,” kusho uNgidi. Uthe iDA ikhulumile ngoba ifike ngesikhathi.