UGigaba unxuse i-ANCYL ukuba iphume ezindabeni ze-ANC
UNGQONGQOSHE wezaseKhaya kuleli uMnuz Malusi Gigaba unxuse amalungu e-ANCYL ukuba aphume ezindabeni ze-ANC wathi awanake izinkinga zentsha.
Ekhuluma emcimbini wokugujwa koSuku lweNtsha ngesikhathi evakashele umndeni kamengameli wokuqala we-ANCYL, uMnuz Anton Lembede eMbumbulu ngoMgqibelo, uGigaba uthe abaholi be-ANCYL kumele baqhube imfundo phambili futhi bahloniphe.
“Kumele abaholi be-ANCYL basike iphethini kuLembede owayeyisigayigayi esikhonze imfundo futhi esinenhlonipho,” kusho uGigaba.
Uthe intsha yakuleli ibhekene nezinkinga eziningi idinga abaholi be-ANCYL ukuba ibaxazulelele zona.
“Uma amalungu e-ANCYL nobuholi bayo bengazinaki izinkinga zentsha lokho kungenza ukuthi uKhongolose ulahlekelwe ivoti labantu abasha,” kusho uGigaba oke waba ngumholi we-ANCYL.
UGigaba uphinde wahambela nasethuneni likaLembede lapho efike amhlonipha khona waphinde watshela abantu ngomlando waleli qhawe.
“Ithuna likaLembede kumele libe isiziba lapho amalungu e-ANCYL eKZN ephuza khona amanzi,” kusho uGigaba.
Uthembise umndeni kaLembede ukuthi uzozisukumela izicelo zawo kuhulumeni.
Okhulumela lo mndeni, uNkk Sibongile Lembede-Gumede uthe uhulumeni kaKhongolose wabathembisa izinto eziningi kubalwa nokwakhiwa kwesikhungo i-multi purpose centre ngo-2002 kodwa kuze kube manje akukaze kwenziwe lutho.
Uthe bayabonga ukuthi umgwaqo omkhulu eThekwini obuwaziwa ngoSmith uqanjwe ngoLembede.
“Sifisa ukuthi igama lakhe kuqanjwe ngalo nezakhiwo yikhona iqhaza lakhe emzabalazweni lizohlale likhumbuleka,” kusho uNkk Lembede-Gumede.
UGigaba uthe bashaya amakhala ngendlela uLembede ashona ngayo.
Babenokusola ngokushona kukaLembede kodwa bekungekho ababengakwenza ngoba wayeshone kudala kakhulu.
ULembede washona eneminyaka engu-33, ngo-1947.