#Asikhohliwe amagalelo entsha yango-1976
NGAPHANDLE kwentsha ka-1976 kuningi okungabe kwehlukile, nezindaba esizibikayo ngabe zehlukile. Yiwona myalezo ebesifuna ukuwugqamisa oshicilelweni lwangoLwesihlanu olwedlule lapho besinomkhankaso wokuhlonipha intsha eyama isibindi ilwa nohulumeni wengcindezelo ngo-1976.
Lolu shicilelo belwehlukile njengoba sibe ‘nempinda’ yekhasi lokuqala kepha leli ephindiwe belishicilelwe ngolimi lwesiBhunu.
Sifisa ukucacisa nokugcizelela ukuthi iphephandaba lakho Isolezwe lisaqhubeka nokushicilela izindaba ngolimi lweSiZulu oluqondile.
Okwenzeke ngoLwesihlanu kwakukhethekile, kuhambisana nomkhankaso wokugubha uSuku lweNtsha nokuhlonipha amaqhawe ango-1976.
Sizoqhubeka mfundi nokukwethulela izindaba ezishisayo, ezifundisayo, ezazisayo nezithokozisayo, sikwethulela zona ngolimi lukaMageba.
Siyanibonga nani bafundi ngokuqonda umyalezo obuhambisana nalo mkhankaso.
Siyazi kukhona nongehlanga kahle kubona. Inhloso bekungekona ukunifunza eningakuthandi kepha besisophe ukuveza ukubaluleka kweqhaza lentsha yango-1976 eyalwa iphikisana nohulumeni wengcindelezo owawusushaya umthetho wokuthi kufundwe ngesiBhunu nasezikoleni zabantu abamnyama.
Ukube kuthiwa intsha ayivukanga umbhejazane, mhlawumbe ngabe laphumelela iqhinga likahulumeni owayebusa lokuqhubeka nokucindezela abantu abamnyama ngokubafunza isiBhunu.
Namhlanje nathi siyiphephandaba sikwazi ukunethulela izindaba ngolimi lwesiZulu nangokukhululeka ngenxa yeqhaza labantu abasha ababhekana ngqo nenselelo.
Yingakho kule nyanga sisebenzisa nama-hashtag ahambisana nokubungaza intsha ka-1976 siphinde sigqugquzela nentsha yanamhlanje ukuba ivuke izithathe nayo ibhekane nezinselelo zanamuhla.
La ma-hashtag athi #Asikhohliwe #SibongaAsiphezi #VukaMntomusha #IngaweLento esiwasebenzisa emakhasini ethu ezinkundleni zokuxhumana (Facebook, Twitter no-Instagram), siyanigqugquzela nani bafundi bethu ukuthi niwasebenzise.