Abawuvali umlomo abafundi abebecijwa kwi-Accounting
BACIJWE kwi-Accounting ngoSuku lweNtsha abafundi bezikole ezehlukene abafunda u-matric eThekwini ngoMgqibelo.
Abawuvali umlomo abafundi be-Accounting abangu-1 064 abebelekelelwa mahhala yi-University Of KwaZulu-Natal (UKZN) ophikweni oluseWestville. Bathi bazoziphuzela ezivivinyweni zaphakathi nonyaka kulesi sifundo.
UDkt Msizi Mkhize, ofundisa lesi sifundo kule nyuvesi ubakhombise izindlela ezilula zokufunda lesi sifundo abanye esibanika inkinga.
“Bengibakhombisa nokuthi bangayifaka kanjani iMaths kwi-Accounting, phela izincwadi azibuvezi ubudlelwano balezi zifundo. Iziqu zami zobudokotela ziyabuveza yingakho ngisiza abafundi,” kusho uMkhize.
UNtombikayise Khoza (17) waseDassenhoek High uthe lubasize kakhulu lolu hlelo.
“Zaze zaba lula izindlela esikhonjiswe zona ezigxile ekwazini into,” kusho uNtombikayise.
USibonelo Dlamini (18) waseManzimtoti High uthe: “Lolu hlelo lungisize ukuthi ngazi ukuthi ngingaphendula kanjani imibuzo ngobuchule nempumelelo. Ngikuthokozele ukuthola ithuba lokuthola izindlela zokulungisa imiphumela yami ye-Accounting ngoba iphupho lami ukufunda iBComAccounting.”
Omunye wothisha obephelezele abafundi, uMnuz Sicelo Sithole, ofundisa eNanda Comprehensive High, ubabaze ikhono likaMkhize.
“Ngicela nathi siqeqeshwe kulesi sifundo. Ngivuleke amehlo.”
UMnuz Jabulani Mhlongo ongumzali kaSiphosomusa Mhlongo ofunda ePinetown Boys High naye obekulolu hlelo, uthe ujabule futhi nengane yakhe ifunde lukhulu.
“Usekhanyiseleke kakhulu uSipho nge-Accounting, uthi useyizwa kahle. Siyalubonga uhlelo.”