UBuchanan uzobhekwa yi-United azoziqeqesha nayo
IMARITZBURG United izomema uKeagan Buchanan ochithwe yiKaizer Chiefs ngeledlule ukuba azoziqeqesha neqembu ukuhlola noma bangamsayina yini.
Lokhu kudalulwe ngusihlalo weqembu, uFarouk Kadodia, ongakufihlanga ukuthi banesifiso sokusayina uBuchanan oyibamba esiswini, nakuba bengeke bemsayine bengambonanga egijima.
UBuchanan uchithwe yiziMpofana ngeledlule nabanye abadlali obane – Tsepo Masilela, Sbusiso Khumalo, William Twala no-Edmore Chirambadare.
Bonke bachithwe sebehlale iminyaka emibili eqenjini emuva kokuba befike ngo-2016. Unozinti uBrilliant Khuzwayo usesayine nezimbangi ezinkulu zeChiefs, i-Orlando Pirates, ngemuva kokuvalelisa emdlalweni weligi wokugcina iChiefs eyawunqoba ngo-2-1 ibhekene ne-Ajax Cape Town.
“Sizomumema ukuba azoziqeqesha nathi kungekudala. Sifuna ukumbona kahle ukuthi ngabe yini ebidala ukuthi angadlali. Uma sesimbonile sizobe sesazi ukuthi ngabe yizizathu ebezingaphezu kwakhe noma ubehlushwa wukulimala. Okunye okubalulekile wukuthi sifuna ukubona ukuthi ngabe uwuhlobo lo mdlali elizokwazi yini ukungena khaxa esitayeleni sokudlala kweTeam Of Choice,” kusho uKadodia.
Akacacisanga ukuthi ngabe uzofika nini uBuchanan eMphithi.
IMaritzburg iqede isendaweni yesine kulogi, yaqopha nomlando wokungena kowamanqamu okokuqala kodwa yehlulwa yiFree State Stars ngo-1-0 kwiNedbank Cup, eCape Town Stadium.
UKadodia uthe nakuba befisa ukujoyinwa nguBuchanan kodwa ezinsukwini zanamhlanje kulukhuni satshe ukusayina umdlali ngokuthembana ngoba kuthi nxa sekuvela “izinto” kube nzima ukubuyela emuva.
“Uma kubhekwa konke yibhizinisi leli akudlalwa lapha. Uma umdlali eke wasayina kunzima ukubuyela emuva uma sekukhona izinto ozibonayo. Yingakho sifuna ukuzinika isikhathi ngokuthi simsondeze eduze aziqeqeshe neqembu bese sithatha isinqumo ngaye,” kuqhuba uKadodia.
UBuchanan uphikwe yizinto kwiChiefs ngemuva kokuvela ukuthi ubehlushwa wukulimala. Udlale imidlalo emithathu kwi-Absa Premiership ngesizini ephelile ka-2017/18. Imenenja kaBuchanan, uPaul Mitchell, weSiyavuma Sports Group ikhale ngokubanjwa wumkhuhlane ngesikhathi ishayelwa ucingo. Icele ukuba ithintwe kahle maphakathi nesonto.
Uma engagcina esayinile kwiMaritzburg United uBuchanan, kuyofanele azibambe ziqine njengoba ezobanga ijezi noFortune Makaringe noSiphesihle Ndlovu abangawubambi umshini esiswini seTeam Of Choice.