Kuyamaniswa nomsebenzi ukubulawa kwephoyisa
KUSOLWA ukuthi kuhlangene nomsebenzi ukubulawa komseshi waseMlaza ohlaselwe ngamadoda ayisithupha amdubula washona, eMalukazi, ngoMsombuluko ebusuku.
UWarrant Officer, Sibusiso Njabulo Linda (54), obengekho emsebenzini ngesikhathi ehlaselwa kuthiwa udutshulwe ehleli nowesifazane emotweni yakhe.
Okhulumela amaphoyisa kulesi sifundazwe, uBrigadier Jay Naicker uthe umufi ubengumphenyi esiteshini samaphoyisa eMlaza.
“Kusolwa ukuthi amadoda ayisithupha afice umufi ehleli nomunye umuntu emotweni, aphoqa ukuthi aphume emotweni, bamdubula washonela endaweni yesigameko. Obehleli naye ulimele ngesikhathi kuhlaselwa umufi. Isibhamu sikamufi sithathwe ngabasolwa ngaphambi kokuthi babaleke,” kusho yena.
Okhulumela umndeni, uNksz Bali Dweku, uthe umufi ubewuthanda umsebenzi wakhe futhi akangabazi ukuthi ukubulawa kwakhe kuhlangene namacala abucayi abewaphenya.
“Ubephenya amacala abucayi okubulala nawokugqekeza kuhlonyiwe. Yize ebephenya amacala amabi kanje kodwa ubengakaze ahlaselwe ngoba ubewumuntu oqaphelayo, okungelula ukuthi adutshulwe noma yikanjani. Ngiyacabanga ukuthi yingakho abasolwa beze benza itulo lokuthi babe yisithupha, ukuze bamhlasele,” kusho yena.
Uqhube wathi, ngokwazi komndeni umufi yize ebengayile emsebenzini kodwa ubeyokwenza into exhumene nawo.
UNksz Dweku uthe umufi obesesebenze esiphoyiseni iminyaka engaphezu kuka 25, ushiye unkosikazi wakhe, uNkk Bathokozile Linda, nezingane eziyisikhombisa. Izolo uthe bebengakazi ukuthi uzongcwatshwa nini.
UKhomishana wamaPhoyisa KwaZuluNatal osabambile, Lt General Nhlanhla Mkhwanazi, ukugxekile ukubulawa kukaWarrant Officer Linda.
Uthe usejube ithimba lamaphoyisa aphenya ngamacala obugebengu obuhleliwe esifundazweni, iProvincial Organised Crime Unit ukuthi liphenye ngokubulawa kwakhe.
“Ngizwelana nomndeni, nozakwethu ngalesi sehlo. Nginxusa umphakathi ukuthi usebenzisane nabaphenyi ngolwazi olungaholela ekutheni kuboshwe abathintekayo,” kusho uLt Gen Mkhwanazi.